EDITORYAL - Propaganda sa China nga panggubot

Kagahapong adlawa, Mayo 29, gisaulog sa People’s Republic of China pinaagi sa ilang consul dinhi sa Sugbu ANG China-Philippines Friendship Day and Film Festival diin giimbitahan ang daghang mga inilang mga Sugbuanon ug mga sakop sa media ug ubang sektor.

Pero luyo aning ilang pag-minaayo dinhi, dunay gipakatap nga mga fake news sa mga Chinese websites ug social media platforms nga pangdaut sa Pilipinas.

Nidistansiya na daw ang Armed Forces of the Philippines palayo kang Presidente Ferdinand Marcos Jr. human sa nahitabong buto-buto sulod sa Senado niadtong Mayo 13,2026 samtang gisuwayan og dakop Senador Ronald “Bato” Dela Rosa tungod sa warrant of arrest gikan sa ICC.

Napatik ni sa Chinese language social media nga Baidu’s Baijiahao and Haokan, Sohu, NetEase's 163.com, ifeng/Phoenix, Weibo, WeChat, Toutiao, Douyin, TikTok, Xigua ug Bilibili sumala pa sa report sa Philstar.com.

Sumala pa sa mga eksperto nga nianalisar sa mga posts sa maong mga platforms, mura og pare-parehas ang mga wordings o mga pulong. Nagpasabot ba ni nga posibleng usa ra ka tawo o organisasyon ang tinubdan sa maong fake news?

Mura og pangkondisyon  nila ni sa hunahuna sa mga netizens didto sa China ug pangimpluwensiya sa mga Pilipino nga nagsunod aning mga Chinese websites ug socmed.

Ang pipila ani nga social media platforms naay mga Pilipinong nagsunod dinhi sama anang TikTok ug Bilibili maong abot sab dinhi sa Pilipinas ang ilang pagpakatap og fake news.

Ang komentaryo bahin ani, mura og tinuod na gyud nga wa na suportahi sa AFP si PBBM ug naa pay nisugyot nga mas maayo pang mabalik ang mga Duterte kay siguradong mabalik ang maayong relasyon sa China ug Pilipinas.

Una sa tanan, walay mga susama nga report nga nahitabo dinhi, ug  gihimakak sa tigpamaba sa AFP nga si  Rear Adm. Roy Vincent Trinidad  ang maong mga gipakatap nga estorya didto sa China.

Klaro kaayo ni nga usa ka propaganda, kay kun magkagubot ang gobiyerno sa Pilipinas, silang mga Chinese ang mabulahan.

Samtang dili sigurado kun kinsa ang nagpasiugda ani, apan sukad-sukad wala pa mahitabo nga dunay nanggawas sa mga Chinese websites ug social media platforms nga walay pagtugot gikan sa ilang gobiyerno.