Botasyon sa Lunes

Dinalian para sa majority bloc sa Senado ang pag-usab sa lagda aron katugotan ang pag-apil sa deliberasyon ug botasyon online. Giatiman dayon nila ang sugyot ni Rodante Marcoleta human napulihan ni Alan Peter Cayetano si Tito Sotto.

Pero napasagdan tungod sa mas seryusong problema: Unsaon pagbabag ang National Bureau of Investigation (NBI) sa pagpatuman sa arrest warrant sa International Criminal Court (ICC) batok ni Bato dela Rosa. Wala matuki human sa kudeta sa Mayo 11 hangtod sa butobuto sa Senado sa Mayo 13 ug paglayas ni Bato sa Mayo 14.

-o0o-

Uwahi nang nabantayan nga apiki ilang panahon. Bakasyon na nila sunod semana. Mahimong mapriso na si Jinggoy Estrada karong weekend ug si Joel Villanueva sa mosunod nga duha ka semana.

Kon dili mausab ang lagda, maapiki ang impeachment trial ni Bise Presidente Sara Duterte nga gitakda nga sugdan sa Hulyo 6. Kon 10 na lay mahibilin sa majority bloc, lupigon sila 11 ka mga sakop sa minority bloc sa mga botasyon atol sa husay. Labi g’yung gikahadlokan nga dili nila mabaraw ang pagpa-abli sa bank accounts ni VP Sara.

-o0o-

Giuna niadtong Lunes ang pasangil ni Imee Marcos sa pagkanselar sa 2028 elections. Nga ang tinuod nga tuyo mao ang pagpugong sa ilang mga kauban nga nagplanong mobalhin sa ilang suporta ngadto ni Win Gatchalian. Pero nauwawan sila ug napugos si Imee pagbakwi sa iyang video.

Maong gipamugos niadtong Martes. Pero nabulilyaso kay wala pa makumplito ang Committee on Rules. Dihang niinsistir si Cayetano og botasyon, ni-walk out ang minority bloc ug nawad-an sila og quorum.

-o0o-

Mosuway na sab sila sa pagpugos sa botasyon karong Lunes. Uban ang panghinaot nga dili pa mapriso si Jinggoy ug motunga na si Chiz Escudero (kinsa absent niadtong Martes). Dili na maka-walk out ang minority bloc ug mopatigbabaw ang majority bloc, 12-11.

Pero sa akong pagsuwat niini, napasaka na sa Ombudsman ang kasong plunder batok ni Jinggoy sa Sandiganbayan. Nga mahimong mopagawas dayon og arrest warrant. Kon dili makatambong si Jinggoy (kay dili man makapiyansa para sa iyang temporaryong kagawasan), 11-11 ang resulta sa botasyon. Nga, ubos sa lagda sa Senado, mobasura sa gisugyot nga kausaban.