Kamada sa Senado
Kon mapriso si Senador Jinggoy Estrada karong semanaha ug si Senador Joel Villanueva sa mosunod nga duha ka semana ug padayong magtago si Senador Bato dela Rosa, mahitabo ang talagsaon nga kausaban sa Senado:
•Mas daghan na ang minority bloc (11) kay sa majority bloc (nga mahimo na lang 10);
•Magpabilin sa puwesto si Senate President Alan Peter Cayetano pero ang minority bloc na ang modominar sa mga botasyon; ug
•Kon dili makakuha ang minority bloc og dugang duha ka senador, silang Cayetano ug kaubanan padayong magkontrolar sa mga komitiba.
***
Kon walay mahitabo nga laing kudeta sa Senado hangtod sa sunod semana, palandonga unsay mahitabo sa impeachment trial ni Bise Presidente Sara Duterte nga gitakda nga magsugod na karong Hulyo 6:
•Si Cayetano gihapon ang presiding officer sa Senate impeachment court; pero
•Ang tanan niyang desisyon sa pagdawat ug pagsalikway sa mga ebidensiya ug mga testimoniya, sama sa gikabalak-an nga pagbalibad niya nga ma-ablihan ang bank accounts ni VP Sara, mahimong hagiton ug balihon sa mas daghang senator judges sa minority bloc nga aktuwal nga makatambong sa husay.
***
Maong mas agresibong iduso sa majority bloc karong Lunes (kon mas daghan pa sila) ang pag-usab sa lagda sa Senado aron katugotan ang mga senador pag-apil sa deliberasyon ug botasyon, labi na sa impeachment trial, bisan dili makatambong sa linawas:
•Apil si Bato nga posibleng magtago sa langob (kon dunay signal); ug
•Silang Jinggoy ug Joel sa ilang selda sa male dormitory sa Quezon City Jail (kon tugotan sa Bureau of Jail Management and Penology ang internet access).
***
Nganong napakyas man silang Senate Minority Leader Tito Sotto ug kaubanan sa pagkumbinser sa pipila ka sakop sa majority bloc sa pagpaluyo ni Sherwin Gatchalian isip Senate President?
•Tingali wala magtagad ang Malakanyang pagtanyag nga aregluhon ang mga kaso nilang Chiz Escudero, Rodante Marcoleta, Bong Go, Mark ug Camille Villar ug sa anak ni Loren Legarda; pero
•Posibleng mahumok ang ilang paugat kon tinud-on ni Ombudsman Boying Remulla ang dugay na niyang pasidaan pagkiha ug pagpapriso nilang Jinggoy ug Joel (kay bisan kinsang bugoy sa pikas eskina mosulti nimo nga ang hulga mahimong mas gamhanan kon sampolan).
- Latest
