Ten outstanding farmers sa dakbayan gipasidunggan
CEBU, Philippines — Pormal nga gipasidunggan sa kagamhanan sa dakbayan sa Sugbo ang ten outstanding farmers sa siyudad gumikan sa ilang mahinungdanon nga kontribusyon sa agrikultura.
Sila gi-classify sa pito ka kategoriya atol sa awarding ceremony diin gisaulog ang ilang katakus sa lain laing matang sa pagpanguma sama sa vegetable, corn, livestock, cut flower, ug ornamental plant farming. Si Jeffrey Gabayan sa barangay Agsungot ang napili nga outstanding corn grower.
Samtang si Sammy Leyson sa barangay Guba ug Bonifacio Marikit sa barangay Lusaran ang gipasidunggan isip Most Outstanding vegetable growers sa North District samtang sa South District, ang mga top farmers sa susamang kategoriya mao sila si Edwin Paran sa barangay Sinsin ug Leonardo Gabisay sa Barangay Babag.
Napili nga top livestock grower sa norte mao sila si Eugene Leyson sa Adlawon ug Dennis Dabuco sa barangay Malubog ug Angeles Tabas sa Toong diha sa South District.
Ang taga Sirao nga si Mateo Borres napili nga Outstanding Cut Flower grower samtang sa Pamutan napili si Melchorie Econas isip Outstanding Ornamental grower.
Segun sa tahu sa Cebu City PIO, ang top farmers nakadawat og tag P10,000 matag usa ingon man plaque of recognition.
Ang lima ka mga finalists ang gihatagan usab og P5,000 ingon man plaque of appreciation gumikan usab sa ilang pagkugi.
“Dugay na gyud ko nagdamgo nga i-modernize gyud unta ang atong panguma kay kon magsige lang ta og piko, pala, guna, hinay ang produksyon,” suma pa ni City Councilor Pastor “Jun” Alcover Jr., ang chairperson sa Agriculture committee sa siyudad.
Gawas sa paghatag og award sa mga top performing farmers gipahibawo usab ni Alcover ang plano sa dakbayan nga mopalit og modern tractors aron makatabang sa mga mag-uuma ug mahimo sila nga mas produktibo. (BANAT NEWS)
- Latest
