EDITORYAL — Impeachment vs VP Duterte

Miirog na sa Ubos Balay Balauranan ang impeachment complaint batok kang Bise Presidente Sara Duterte-Carpio human nga 215 ka mga kongresista ang nipirma sa endorsement aron siya palagputon sa pwesto.

Nagkinahanglan lang og 102 ka kongresistang uyon para sa kining impeachment complaint moirog. Atol sa pagpirma kagahapon, dunay 306 ka mga magbabalaod nga nitunga.

Siya ang labing unang naglingkod nga bise presidente sa nasud, ikaduha sa labing gamhanang opisyal sunod sa presidente nga ipaubos sa impeachment trial kun madayon. Ang reklamo nag-ugat tanan sa pasangil nga iregularidad sa paggamit sa confidential funds sa bise presidente ug pundo sa DepEd.

Matud pa giusa ang tanang rason nganong kinahanglang tangtangon si Duterte sa gahum gikan sa tulo ka unang impeachment complaints nga wala aksyoni sa House Speaker.

Ning ikaupat nga impeachment complaint, ang lead complainant mao ang presidential son nga si Senior Deputy Majority Leader Sandro Marcos.

Ubos sa House rules, ang impeachment complaints moagi pa og makuting pagsusi sa justice committee nga motan-aw kun sakto ba kini ug hatagan og gireklamong opisyal og panahon sa pagtubag.

Moduso dayun ang komitiba og resolusyon ngadto sa plenaryo, dayun magbotaray nasab, kun moabot og one-third ang uyon, moabante kini ngadto sa Senado.

Apan tungod kay suspendido ang sesyon sa Pebrero 7, gipaspasan kini ug diretso na kini sa trial, ug ang Senado mao nay mobarog isip impeachment court sumala pa sa report sa Philstar.com.

Kinahanglang dunay two-thirds vote — o 16 sa 24 ka senador aron makombikto ug matangtang sa katungdanan ang usa ka opisyal.

Hinuon si Duterte makasalig nga babagan sa iyang mga kaalyado diha sa Senado ang maong tinguha.

Dili siya pabayron og danyos o bilanggoon, ang normal nga korte na maoy mohimo niini kun dunay mopasaka kaniya og kasong kriminal.

Kun makalingkwas si Duterte ani, gidili sa Konstitusyon ang pagpasaka og laing impeachment complaint batok kaniya sud sa usa ka tuig.

Makaayo ba sa nasud ug sa mga Pilipino kining maong lakang nga mismo si Presidente Ferdinand Marcos Jr. supak man niini kay alang kaniya dunay mas daghang angay unahon aron maserbisyohan ang katawhan?