UC Baby Webmasters milangkat sa korona
CEBU, Philippines — Ang University of Cebu (UC) Baby Webmasters mipiog sa University of San Jose-Recoletos (USJ-R) Baby Jaguars, 63-60, sa kulbahinam nilang sangka sa finals aron sakmiton ang kampiyonato sa duha ka adlaw nga Mayor Carlo Villamor Carmen Fiesta Cup Basketball League 2024 niadtong Biyernes sa gabii didto sa Carmen Sports and Civic Center.
Nabiyaan og singko puntos, 43-48, sa ikatulong kuwarter, ang Baby Webmasters milusad og madasigong resbak sa naghinapos nga bahin sa makutas nga aksiyon dayon na sa pag-ipsot ngadto sa tres puntos nga kadaogan.
"Malipayon kaayo ko nga na-champion mi even sa kagagmay sa ako mga players ug kadaghan nila og new set of players," matud pa ni Baby Webmasters head coach Joever "Brad" Samonte. "Nag-adjust pa ang mga bata sa ilang teammates pero ako gi-instill sa ilang mind nga modepensa ug maninguha gyud kay mao rana amo ticket sa kadaogan."
"For now, nagkinahanglan pa gyud mi og daghan mga tournaments nga apilan in preparation sa CESAFI 2024 season aron magka-jell ang akoa new and old players," dugang pa ni Samonte.
Si Jake Yong maoy nangu sa Baby Webmasters uban ang 11 puntos. Sila si Carlo Salgarino ug Burj Lapu-os nagkumboya'g 18 puntos, samtang sila si Kieth Buot ug Kyle Bayug mitali og siyete puntos matag usa timaan sa balanseng ataki sa UC nga naghatud kanila ngadto sa gihandum nilang titulo.
- Latest
