Casili, Fatima naghari sa Lamac League 2024
CEBU, Philippines — Bisan pa dunay gamay nga mga kakulian, nagmalampuson gihapon ang Barangay Lamac League 2024 diin ang Casili ug Fatima ang nilugwa nga kampiyon sa ilang tagsa-tagsa ka dibisyon.
Ang Casili nakaipsot sa Pulpogan pinaagi sa buzzer-beater ni Cyril Sabellana, 71-69 aron maghari sa Inter-Barangay Open nga dunay import kada team.
Tungod niini, ang Casili nibulsa og P25,000 samtang ang Pulpogan nibitbit og P15,000. Ang barangays Lamac ug Cabangahan nakadawat og P5,000 nga consolation prizes.
Sa laing bahin, ang Fatima nipaluhod sa Nitrams Trading, 76-63 aron koronahan nga kampiyon sa Inter-Purok Senior division nga gisalmotan og 14 ka teams. Ang G-Unit ug Sampaguita All Star nakadawat og consolation prize matag usa.
Gitunolan sa labing taas nga dungog mao silang Paulo Dalumpines, active player sa Cebu Roosevelt Memorial Colleges (CRMC) Mustangs nga nagbasi sa Bogo City isip Season MVP ug CJ Alilin sa University of the Visayas (UV) Green Lancers isip Finals MVP ubos sa Inter-Barangay Open ug silang Jed Angeles (Season MVP) ug Darius Edrian Casiao (Finals MVP) sa Inter-Purok Senior division.
Ang liga gipasiugdahan sa Barangay Council uban sa suporta ni Brgy. Capt. Nestor Maglasang. Giabagan sab kini ni league commissioner Hon. Roy Ermac, assistant commissioner Hon. Martin Colubio ug technical head Jun Resti Tumongha.
- Latest
