Core Pacific, GMall mag-abot sa kampiyonato sa division A

Batch 2013, 2011 abante sab sa SHAABAA finals

CEBU, Philippines — Ang Core Pacific Group ug GMall of Cebu mitagak sa ilang mga karibal hinungdan nga sila maoy mag-abot sa kampiyonato sa Division A sa Sacred Heart Ateneo Alumni Basketball Athletic Association (SHAABAA) Season 27  didto sa SHS-AdC Magis Eagles Arena sa Barangay Canduman, dakbayan sa Mandaue.

Si SHAABAA chairman Afshin Ghassemi mipabuto og 23 puntos, walo ka rebounds, duha ka assists ug tulo ka steals samtang si Pierre Mella mikadlit og 18 puntos, walo ka rebounds, tulo ka assists ug duha ka steals aron pangulohan  ang Core Pacific ngadto sa 118-38 nga pagmasaker sa Yangtze Ice.

Miposte si Jeremy Ryan Huang og double-double nga 17 puntos ug 10 ka rebounds uban ang duha ka assists ug upat ka steals alang sa Core Paficic nga makigharong sunod batok sa GMall of Cebu, nga miabante sa finals human gipalagpot ang 2kcares.org, 83-39.

Si Tonyson Luther Lee maoy nangu sa GMall bitbit ang 14 puntos ug walo ka rebounds, samtang sila si Paulsen Uy, Andrew Erazo, ug John Paul Go nagkumboya'g 35 puntos, 16 ka rebounds, ug upat ka assists.

Sa laing bahin, ang Nest Workspaces Batch 2013 ug Puresteel Manufacturing Corporation Batch 2011 miangkon sab og luna sa finals.

Sa Division C, si Arc Gabriel Araw-araw miharos og 20 putnos, lima ka rebounds, tulo ka assists ug tulo ka steals, samtang sila si Fletcher Galvez ug Emman Malazarte parehong mirehistro og double-double sa dihang gipabakwit sa defending champion Batch 2013 ang FADI Batch 2021, 71-51.

Si Galvez adunay 12 puntos, 11 ka rebounds, ug duha ka assists samtang si Malazarte mihipos og 12 putnos, 12 ka rebounds, ug upat ka assists.

Sa Division B, si Bernard Chioson mipupo og 18 puntos ug 11 ka rebounds, samtang si Franz Pacheco midona rog 17 puntos ug upat ka rebounds sa dihang gipatikangkang sa Batch 2011 ang Radius One Batch 2007 packing, 79-57.

Sa laing bahin, ang ZLREJ Trading & Construction Batch 2010 ug Xchange Forex Batch 2018 naka-angkon pa og laing kinabuhi human gitumba ang twice-to-beat nilang mga kaatbang.

Si Jasper Diaz mibubo og 22 puntos ug 20 ka rebounds, si Gabe Branzuela mikolekta og 25 puntos, pito ka rebounds ug pito ka steals, samtang si Joseph Zozobrado mitapos uban ang 17 puntos ug unom ka rebounds aron ituboy ang Batch 2010 ngadto sa 70-49 nga paglampornas sa For the Win Batch 2004.

Sa laing bugno sa semis, si Benedict Andre Chua mibomba og 20 puntos ug 12 ka rebounds, si Lyder Kent Canieso mikimada og 12 puntos ug siyam ka rebounds, samtang si Eroll Pastor mitimbre og 11 puntos ug walo ka rebounds sa dihang gipakuratan  sa Batch 2018 ang Cebu Landmasters/CloudKart Batch 2014, 69-60.