Paglilinis sa IGL license, tuluy-tuloy – PAGCOR
MANILA, Philippines — Tiniyak kahapon ng Philippine Amusement and Gaming Corporation (PAGCOR) na tuluy-tuloy ang isinasagawa nilang paglilinis sa hanay ng kanilang mga Internet Gaming Licensees (IGLs), na dating kilala sa tawag na POGOs, upang masugpo ang mga iregularidad at mga criminal activities.
Ayon kay PAGCOR Chairman at CEO Alejandro Tengco, mula sa orihinal na 46 kumpanya na nabigyan ng lisensiya sa ilalim ng kanyang administrasyon noong nakaraang taon, ay naging 42 na lamang ang aktibong licensees matapos kanselahin ang lisensiya ng isa pa noong nakaraang linggo, at suspindihin naman ang tatlong iba pa.
“Despite the lower number of IGLs and service providers today, we are proud to say that we collect more fees from them compared with the previous administration,” aniya.
Nabatid na ang bawat IGL ay nagbabayad ng guarantee fee na US$100,000 kada buwan o 2% ng kanilang gross gaming revenues.
Nagbabayad rin sila sa pagitan ng US$25,000 at US$100,000 buwan-buwan bilang administrative fees, depende sa laki ng kanilang operasyon.
Bukod sa IGLs, ang PAGCOR ay nag-isyu na rin ng permits sa 20 Service Providers at 14 permits para sa Special Classes ng BPOs.
Ang mga service providers ay pinagbabayad ng US$85,000 monthly, habang ang mga Special Class BPOs ay nagbabayad ng US$10,000 kada buwan.
Sinabi ni Tengco na, “during the previous administration, no administrative fees were being collected from POGOs, while service providers were only charged application fees of varying amounts. Special Class BPOs were not paying anything at all”.
- Latest
