EJKs ni Duterte
Hinaot nga ang imbestigasyon sa House of Representatives sa laktod nga pinatyanay sa kampanya batok sa drugas ni kanhi presidente Rodrigo Duterte moapil og imbitar sa mga tagtungod sa inosenteng mga biktima sa Sugbo. Ang imbestigasyon sa Committee on Human Rights sa House nga gitakdang himuon karong Miyerkules, Mayo 22, mopatawag sab sa mga opisyal sa kapolisan ug mga sakop sa gabinete ni Duterte.
Maayo unta kon ang mga kongresista sa Sugbo makapahibawo sa komitiba sa kaso sa 4 anyos nga si Skyler Abatayo nga taga Bato, Ermita, Cebu City.
***
Hapon sa Hulyo 10, 2019, si Skyler bag-o lang nahuman paghimo sa iyang assignment dihang may sipa nga buto, nalup-og sa sawog nga duguon ang dughan ug wa nay panimuot. Gibaswat sa iyang inahan nga nisiyagit og pakitabang sa ilang mga silingan.
Giduol dayon sila sa mga polis. Nga nangangkon nga nitubag og alarma sa marijuana ug shabu repacking session sa lugar. Patay na si Skyler pag-abot sa ospital. Gipanghimakak sa Cebu City Police Office nga mga polis maoy nakapatay ni Skyler ug nagpadala og buwak sa iyang haya.
***
Nipasangil ang mga polis nga mga durugista nga ilang gikapinusilay maoy nakapatay ni Skyler. Pero usa ra ka buto ang nadunggan sa mga silingan. Maong nagpatabang sila sa National Bureau of Investigation (NBI).
Bisan gibabagan sa kapolisan ang imbestigasyon, ang NBI nakahipos og mga ebidensiya nga sakop sa Carbon Police Station ang nakapusil ni Skyler ug nga gimaniobra ang paraffin test aron pagpakita nga way polis nga nakapabuto sa ilang armas (nakalimtan ang ilang pangangkon sa pinusilay).
***
Human gipasaka sa NBI ang mga kasong kriminal ug administratiba batok sa hepe ug duha ka sakop sa presinto sa Ombudsman, gilabay ang regional director sa NBI Central Visayas ngadto sa Mindanao. Lima ka tuig nang natanggong ang kaso sa Ombudsman. Among nahibaw-an nga ang mga polis wa madutli sa kaso. Ang hepe na-promote gikan sa pagka kapitan sa 2019, ngadto sa pagka major sa 2020, ug pagka lieutenant colonel sa 2023.
Hinaot nga ang imbestigasyon sa House mohatag og hustisya sa mga biktima nga giluba nga way klarong pasangil ug wa hatagi og higayon pagpanalipod sa ilang kaugalingon.
- Latest
