Maleta boy ni Sara?

Si kanhi Police corporal Rodolfo Gracioso walay kalainan sa kanhi marines nga nag-una niya sa pag-angkon nga gisugo sa paghatod og binilyon ka pesos nga kuwarta nga gisulod sa mga maleta. Managlahi hinuon ang destinasyon sa kickback: Si Presidente Ferdinand Marcos Jr. ug mga alyado ang ginganlan sa kanhi marines; samtang si Bise Presidente Sara Duterte ug mga paryente ang gitudlo ni Gracioso.

Managsama silang nipakita og mga letrato sa mga maleta. Managsama sab nga walay napakita nga mga ebidensiya (letrato, video, o resibo) sa aktuwal nga pagdawat sa kuwarta.

Lahi ang ilang estilo pagbisto sa pasangil:

•Ang kanhi marines gikuyogan nilang Atty. Levi Baligod ug kanhi kongresista Mike Defensor sa press conferences (apil na sa gikuwestiyon nga imbestigasyon sa Senate Blue Ribbon Committee nilang Rodante Marcoleta ug Alan Peter Cayetano), kasagaran nila nagpakahilom lang ug nitugyan nilang Baligod ug Defensor sa pag-detalye ug sa pagpasabot sa ilang expose; samtang

•Si Gracioso nisumiter sa iyang affidavit sa National Bureau of Investigation (NBI) nga gisundan sa exclusive interview sa GMA News ug siya ang nangunay sa pagtubag sa mga pangutana.

Pipila sa kanhi marines nibakwi na sa ilang pasangil. Gipasanginlan nga nabayran ni kanhi House speaker Martin Romualdez, kay maoy gi-absuwelto sa ilang bag-ong affidavits. Nidayon hinuon ang Ombudsman pagkiha ni Romualdez, maong napriso na, kay nangangkon nga dunay mas daghang testigo ug dugang pang mga dokumento.

Si Gracioso wala pa makakumbinser ni Ombudsman Boying Remulla. Ipatawag pa sa NBI si VP Sara ug ubang mga gipasanginlan. Aron pagsusi duna bay igong sukaranan pagpasaka og mga kaso.

Nakahimo na ang Philippine National Police (PNP) og pasiunang imbestigasyon kon kinsa si Gracioso:

•Kumpirmado sa records sa PNP nga nadestino siya nga security escort ni kanhi House speaker Lord Alan Velasco sugod sa 2018 hangtod sa 2022 (takdo sa affidavit ni Gracioso); pero

•Kumpirmado sab sa records sa PNP nga nataktak na siya sa serbisyo sugod niadtong Septiyembre 11 karong tuiga, gawas nga nag-atubang og ubang mga kasong kriminal ug administratiba nga niresulta sa tulo ka suspenso sa mga tuig 2024, 2025, ug 2026 ug sa pagkapriso og kaduha sa 2024 ug 2025.