27th PMPC star awards photo - Toni

MANILA, Philippines — Apat na umano’y mi­yembro ng ‘Paihi Gang’ ang nadakip ng Philippine National Police Criminal Investigation and Detection Group (CIDG) kasunod ng buy-bust ope­ration sa Brgy. Concepcion, Malabon City nitong Biyernes. Sinabi ni CIDG NCRPO chief PCol. John Guia­gui, Huwebes ng gabi nang maaresto ang mga suspek at nakum­piska sa kanila ang dalawang tugboat na may lulan ng mahigit 100,000 litrong produktong diesel, na tinatayang nasa P20 mil­yon ang halaga. Kabilang sa mga nakuha ang tatlong container na naglalaman ng humigit-kumulang 50 litro ng diesel petroleum, isang improvised plastic funnel, isang submersible pump, dalawang suction hose, at buy-bust money, na may kabuuang tinatayang halaga na mahigit P15 milyon. Ani Guiagui, sinisipsip ng grupo ang mga produktong langis sa dagat, at ipinamamahagi ang mga smuggled na gasolina sa mga kliyente nila sa Malabon at Navotas sa mas mababang presyo. Nasa kustodiya na ng PNP-CIDG ang mga suspek habang inihahanda ang kasong paglabag sa Presidential Decree No. 1865 (illegal trading of petroleum products).