Paglili sa bilyones

Pila ka adlaw sa dili pa mosugod pagpresentar og mga ebidensiya aron pagmatuod sa pasangil sa ilegal nga katigayonan ni Bise Presidente Sara Duterte sa pagpadayon sa impeachment trial karong Lunes, gipalili na sa House panel of prosecutors ang publiko sa iyang bank accounts:

Kinse sa bank accounts ni VP Sara, nga apil sa gisumiter sa siyam ka bank branches sa Davao ug Metro Manila nga nakadawat sa supina sa Senate impeachment court, nitakdo sa report sa Anti-Money Laundering Council (AMLC) ngadto sa House Justice Committee sa impeachment proceedings niadtong Abril.

-o0o-

Kay dili pa man makahatag og dugang mga detalye tungod sa sub judice rule, nga nagtangag og multa ug disbarment, sunod semana pa kita mahibawo unsang bahina sa report ni AMLC Executive Director Ronel Buenaventura ang nitakdo sa bank accounts nga pasiunang naablihan sa prosecutors. Pero nia ang labing makapakugang nga mga bahin sa report:

•         ?6.7 bilyones ang tanang transaksiyon sa bank accounts ni VP Sara ug sa iyang bana sa niaging 20 ka tuig;

•         ?4.4 bilyones ang tanang deposito; ug

•         ?1.5 bilyones ang tanang withdrawals.

-o0o-

•         ?3.77 bilyones ang mga transaksiyon sa accounts ni VP Sara ug ?2.99 bilyones ang mga transaksiyon sa accounts ni Mans Carpio;

•         ?1.83 bilyones ang tanang deposito sa accounts ni VP Sara ug ?2.59 bilyones kang Carpio;

•         ?1.21 bilyones ang tanang withdrawals sa accounts ni VP Sara ug ?343.32 milyones kang Carpio; ug

•         Dunay laing ?791 milyones wala pa masubay sa AMLC kon deposito o withdrawals ba.

-o0o-

•         Nagsugod og sulbong ang mga transaksiyon sa 2007 kanus-a napili si VP Sara nga bise mayor sa Davao City (niabot og ?208 milyones);

•         Mas dagkong transaksiyon sa 2009 hangtod 2013 nga naglakip sa tulo ka tuig nga termino ni VP Sara sa pagka mayor sugod sa 2010 (kapin ?400 milyones kada tuig);

•         Kinadak-ang mga transaksiyon sa 2009 (?704.93 milyones), 2010 (?648.58 milyones) ug 2011 (?597.15 milyones); ug

•         Nitidlom ang mga transaksiyon human napupos ang termino ni VP Sara pagka mayor sa 2013 (kanus-a nibalik sa City Hall si kanhi presidente Rodrigo Duterte dayong dagan pagka presidente sa 2016).