EDITORYAL - Suporta sa Universal Health Care program
Magandang balita na may P11.54 billion loan mula Japan para suportahan ang Universal Health Care program ng Pilipinas.
Sa bansang maraming maysakit ang hindi makapag-checkup dahil sa kawalan ng pera, malaking bagay ang pondong makatutulong para gawing mas abot-kaya ang serbisyong pangkalusugan.
Pero kailangan ding malinaw: loan ito at hindi libreng pera. Utang ito na babayaran din ng taumbayan. Kaya mas mabigat ang obligasyon ng gobyerno na tiyaking bawat pisong uutangin ay mapupunta sa serbisyong tunay na mararamdaman ng pasyente.
Hindi sapat ang signing ceremony, diplomatic notes, o magandang pahayag tungkol sa partnership. Ang sukatan ng Universal Health Care ay hindi nasa papel. Nasa pila sa ospital. Nasa libreng gamot. Nasa PhilHealth benefit na sapat ang coverage.
Maganda ang layunin ng pondo: sustainable financing, strategic purchasing, mas maayos na delivery ng health services, information management, at performance accountability.
Pero ang mga salitang ito ay kailangang bumaba sa simpleng tanong ng ordinaryong Pilipino: kapag nagkasakit ako, matutulungan ba ako?
Matagal nang pangako ang Universal Health Care.
Noong 2019 pa naisabatas ang UHC, at awtomatikong kasali na dapat ang bawat Pilipino sa national health insurance system. Pero hanggang ngayon, marami pa rin ang takot magpaospital dahil baka hindi kayanin ang bill. Marami pa rin ang bumibili ng gamot nang tingi. Marami pa rin ang umaasa sa medical assistance ng mga politiko.
Kung tunay na palalakasin ng loan na ito ang UHC, dapat unahin ang malinaw na access: sapat na primary care, maayos na referral system, mas mabilis na PhilHealth claims, transparent na spending, at regular na report kung saan napunta ang pera.
Dapat ding bantayan ang accountability. Kapag utang ang ginamit, bawal ang palpak, doble-dobleng proyekto, o pondong mawawala sa bureaucracy. Hindi puwedeng health reform sa press release pero hirap pa rin ang pasyente sa ospital.
Ang loan para sa kalusugan ay dapat masukat hindi sa pirmahan, kundi sa mas maikling pila, mas murang gamutan, at mas mabilis na serbisyo.
Kung taumbayan ang magbabayad, taumbayan ang dapat makinabang at wala nang iba pa. Dapat nilang malasap ang bunga ng pinaghirapan at madugtungan ang buhay.
- Latest
