Petro Gazz, ZUS Coffee agawan sa huling semis berth

MANILA, Philippines — Inaasahang magiging balikatan ang pinakahuling pagtutuos ng Petro Gazz at ZUS Coffee sa kanilang quarterfinals series.

Nakataya sa kanilang duwelo sa Game Three ngayong alas-6 ng gabi ang ikaapat at huling semifinals spot sa 2024-25 Premier Volleyball League All-Filipino Conference sa PhilSports Arena sa Pasig City.

Nagtabla sa 1-1 ang best-of-three showdown ng Gazz Angels at Thunderbelles.

Humataw ang ZUS Coffee ng 25-21, 25-23, 27-25 panalo sa Game One at rumesbak ang Petro Gazz sa Game Two, 25-19, 25-13, 28-26, tampok ang pagbabalik ni Jonah Sabete.

Sa pagganti ng Gazz Angels sa Thunderbelles ay humataw si Fil-Am Brooke Van Sickle ng game-high 17 points.

“ZUS did a great job, they’re a tough team, and I thought, like Creamline, they’re one of the better defensive teams in the PVL right now,” ani Van Sickle.

Muling sasandigan ng Petro Gazz Angels sina Van Sickle, Sabete, Myla Pablo, Aiza Maizo-Pontillas, MJ Phillips, Chie Saet at Jellie Tempiatura.

Sina Jovelyn Gonzaga, Thea Gagate, Chinnie Arroyo, Chai Troncoso, Mich Gamit at Cloanne Mondoñedo ang itatapat ng ZUS Coffee.

Swak na sa single-round robin semifinals ang nagdedepensang Creamline, Choco Mucho at Akari matapos ang two-game sweep sa Chery Tiggo, PLDT at Galeries Tower, ayon sa pagkakasunod.