Seguro g’yung maihaw

Tungod sa popularidad sa mga imbestigasyon sa House of Representatives sa mga atraso nilang kanhi Presidente Rodrigo Duterte ug Bise Presidente Sara Duterte, nagtuo silang Presidente Ferdinand Marcos Jr. ug House Speaker Martin Romualdez nga nakalimot ang katawhan nga mga sakop sila sa pamilyang gitunglo nga labing kawatan sa kasaysayan.

Tungod sa nag-ung-ong nga pagpadakop sa International Criminal Court (ICC) sa amahan ug impeachment sa anak, nagsalig silang Marcos ug Romualdez nga mahimong maniobrahon ang budget sa 2025. Aron pagdugang sa pagpaburot sa ilang katigayonan nga gikasohan kay gituohang kinawat.

* * *

Dili tinuod nga silang Romualdez ug First Lady Liza Araneta Marcos maoy hawod sa administrasyon ug si Marcos Jr. niyango lang nila. Sayop ang awhag nga angayng mangisog si Marcos Jr. ug barawon ang mga pangabuso sa iyang asawa ug ig-agaw.

Tanang gihimo sa administrasyon pagbuot nilang tulo. Tanang maniobra sa budget ilang gibendisyonan. Nagpa-goryo-goryo na lang si Marcos Jr. kay ang mga krimen nga ilang gipasangil batok sa mga Duterte wala kalipat sa katawhan sa makauuwawng paglaslas sa budget sa batakang mga serbisyo aron pagpaburot sa pork barrel.

* * *

Niang lista sa P353 bilyones nga mahimo nang ipamalit og mga boto ug ipuno sa mga bolsa sa mga politiko human gilaslas gikan sa mas importanteng mga serbisyo:

P96 bilyones sa Department of Social Welfare and Development, apil nang P50 bilyones sa Pantawid Pamilyang Pilipino Program; P74.4 bilyones sa Philippine Health Insurance Corporation; P38 bilyones sa edukasyon; P26 bilyones sa Department of Health; P43 bilyones sa agrikultura; P18 bilyones sa Department of Labor and Employment; P17 bilyones sa Department of Transportation; ug P35 bilyones sa Pension ug Gratuity Fund.

* * *

Imbes moangkon nga sayop sila, gibasol sa administrasyon ang mga ahensiya nga napakyas pagasto sa pundo sa nangaging katuigan maong gilaslasan ang ilang budget sa 2025. Sa walay pagpasabot nganong gipaburot ang mga ayuda nga makuha lang kon magpakiluoy ang katawhan sa mga politiko.

Bantay lang ning administrasyona. Gawas nga nag-atras-abante sa mga kaso sa mga Duterte, nagpatuyang pa sa ilang kahakog. Makabalik gani ang mga Duterte sa Malakanyang, simbako layo ra to, dili lang ang ilang ambisyon pagpabilin sa gahom lapas sa 2028 ang maihaw.