‘Foods’

Bakit sa may Ateneo sa Katipunan

Marami ang mais vendors na naghambalang?

Ah, eh… yung punchline atin na lang kalimutan,

‘Wag na lang at baka sabihin n’yong MAIS lang!

Ngek! ‘Yan ang joke na joke lang… eto na talaga —

Bakit ba karaniwan ay mga luto na

Ang mais sa may Ateneo tinitinda?

Eh kasi nga ayaw nila dun ang BERDE pa!

He, he, he… kung bitin pa kayo MAIS-SA PA —

Bakit nga ba talaga doon nagbebenta

Sa may Ateneo na BLUE pa ang Agila?

Eh kasi MAIS CON YELLOW ayaw din nila!

Nyeh! He, he… Parang ‘yung isa pang tanong lang ‘yan —

Bakit sa White Plains sa may Quezon City naman

Maraming KESONG PUTI na mga tindahan?

Eh kasi nga may WHITE at KESONG CITY pa ‘yan!

Well, pasakalye lang ‘yan sa pag-uusapan,

Pasakalye pagkat sa “kalye” na tsibugan

O ‘yung mga street food tawag n’yo karaniwan —

The fastest fast food… Al fresco pa sa Italian!

O isang “stand up” dinner din kung tutuusin

Sapagkat patayo n’yo lamang kakainin,

O mula sa kotse pwede mo nang abutin

And T-T-T-T — Then Tapon ‘Tapos Tsiritin!

Tandang-tanda pa mga unang inabutan

 Na mga kinakaing tinda sa lansangan,

Puto-kutsinta, taho’t dirty ice cream pa lang,

May oras pa dating at sa bahay dadaan.

Kadalasan ang “pot-pot!” o ang pagbusina

Ng bisikleta’y sa hapon para meryenda,

Tinapay na may asukal at mantekilya,

Bitso-bitso’t bibingka, maruya’t carioca.

Halo-halo’t sa malamig unang pumwesto

Sabay na rin saba, munggo at mais con hielo,

At kung minsan naman nag-iinit ang tatlo —

Ubra ring ginatan kung gagamitin ninyo.

At s’yempre sa gabi, “Baluuut!” maririnig mo,

Pang-gabi rin popcorn, pag hapon binatog ‘to,

Mais talaga ang daming pinasok nito

Hanggang sa grumadweyt na nga sa Ateneo!

Meron pa ngang isa na chokaran ng popcorn,

Lagi silang magkatabi pag may peryahan,

Ito ay ang napakaingay na chicharon

Na kapag nadurog labas na ay pulboron!

Inihaw na mais o nilaga man ito,

Nilagang mani, okoy, lugaw, mami, goto,

Lahat ng pansit, lumpiang sariwa at prito,

At di nagtagal nauso na ang barbecue.

Ang Haring Kawayan ay naging paborito,

At sa eskwela kung natatandaan ninyo,

Nilaga lang ang saba pag recess na tayo

Ngunit nung natuhog na’y naging Banana Q!

Pati kamote, tinuhog na kahit ano,

Mga dating tinatapon street food na ito!

Bituka’t lamang-loob ng pet ni San Pedro,

Pati paa ng manok akalain ninyo!

At paano ba natin makakalimutan

Ang paborito ng mahirap at mayaman —

Ang FISH BALL! Ang rich may kanya-kanyang sawsawan

At mga poor naman sa SAWSAWAN NG BAYAN!

Ngek! O street foods mula nang ikaw ay isilang,

Pati mga food streets na rin ay nagdamihan,

Ang EAT talaga ay panghabang-buhay na ‘yan

Kaya nga sa BULAGA ‘yan ang pinangalan!