‘Maymay’ lumakas, Luzon target

MANILA, Philippines — Bahagyang lumakas ang bagyong Maymay habang patuloy itong kumikilos sa kanluran ng Ilocos Sur.

Alas-2 ng hapon kahapon, Agosto 5, namataan ng Pagasa ang sentro ng bagyo sa layong 160 kilometro sa timog-kanluran ng Sinait, Ilocos Sur.

Si Maymay ay kumikilos pahilagang-silangan, taglay ang lakas ng ­hangin na umaabot sa 75 kph at pagbugso na 90 kph.

Inaasahang magla-landfall si Maymay sa Ilocos Sur o La Union ngayong Miyerkoles ng gabi o Huwebes ng ­umaga. Tatawid ang bagyo sa Northern at Central Luzon.

Mananatili itong isang tropical storm habang papalapit sa Philippine landmass. Subalit oras na mag-landfall, hihina ito bilang tropical depression at posibleng maging low pressure area pagsapit ng hapon o gabi ng Huwebes.

Dahil sa hatak ng Habagat, makararanas ng pag-ulan ang Metro Manila.