EDITORYAL — Kredibilidad ng Senado bilang impeachment court
SA Hulyo 6, uupo muli ang Senado bilang impeachment court upang litisin si Vice President Sara Duterte. Ang mga paratang laban sa kanya ay masyadong mabigat: mula sa daan-daang milyong pisong kuwestiyunableng confidential funds, hindi maipaliwanag na yaman, hanggang sa akusasyon ng pag-udyok sa asasinasyon laban sa pamilya Marcos at kay dating House Speaker Martin Romualdez.
Bago pa man magsimula ang paglilitis, hinuhusgahan na ng taumbayan kung karapat-dapat bang maging presiding officer si Sen. Chiz Escudero. Sa papel, si Escudero ang pinakakuwalipikadong mambabatas.
Ayon kay Rep. Paolo Ortega, malaking kalamangan dahil si Escudero mismo ang sumulat ng impeachment rules ng Senado. Isa siyang abogado. Wala pang kasaysayan sa bansa na pinamunuan ng isang hindi abogado ang nasabing hukuman.
Kahit ang lead prosecutor ng Kamara na si Rep. Gerville Luistro ay hinihiling sa publiko na bigyan si Escudero ng pantay na benefit of the doubt. Subalit, ang husay sa batas ay isang patalim na may dalawang talim. Para sa mga kritiko, ang galing ni Escudero ang mismong dahilan kaya tinawag siyang “most dangerous figure” sa Senado.
Hindi pa nakakalimutan ng taumbayan ang ginawa ni Escudero noong 2025. Nang ipasa ang unang reklamo laban kay VP Sara, malinaw ang utos ng Konstitusyon: litisin ng Senado ang kaso “forthwith” o “agad-agad” nang walang pagkaantala. Ngunit gamit ang kakaibang interpretasyon sa salitang ito, nagawang patulugin ni Escudero ang nasabing kaso.
Ito ang dahilan kaya nagsalita na rin si dating Supreme Court Justice Antonio Carpio. Ayon sa mahistrado, ang naganap noon ay isang malinaw na taktika upang i-delay ang pagpapanagot. Binalaan niya na hindi dapat ibasura ng Senado ang kaso gamit lamang ang teknikalidad.
Ang matinding hamon ngayon kay Escudero ay patunayang mali ang kanyang mga kritiko. Ang kanyang tunay na tungkulin ay hindi upang humanap ng butas sa batas para sa nasasakdal, kundi tiyakin na patas ang proseso para sa katotohanan.
Ang pagiging presiding officer ay nangangailangan ng higit pa sa talino sa batas, kailangan nito ng delikadesa.
Kung gagamitin muli ni Escudero ang kanyang husay para magpalusot, hindi lamang ang nasasakdal ang makaiiwas sa pananagutan; ang kredibilidad ng buong Senado ay tuluyang masisira. Mawawasak ito. Huwag sanang mangyari ito.
- Latest
