Sukol o kakak si Sara?
Maklaro karong adlawa kon moapil o mo-isnab ba sa impeachment trial si Bise Presidente Sara Duterte. Mahibaw-an na kon tinuod ba ang pagduda sa pipila ka mga sakop sa House panel of prosecutors nga bisan sa pasidaan ni VP Sara sa bloodbath nahadlok siya nga madayon ang impeachment trial.
Nitubag si VP Sara sa articles of impeachment niadtong Hunyo 1, dihang ang Senado kontrolado pa sa iyang mga alyado nga gipangulohan ni kanhi Senate president Alan Peter Cayetano. Wala pay timaan interesado ba sa husay karon nga bag-o nang mayoriya.
***
Karon ang kataposang adlaw sa pagsumiter ngadto sa Senate impeachment court sa pre-trial briefs, ang listahan sa mga ebidensiya ug mga testigo nga ipresentar sa prosekusyon ug sa depensa atol sa impeachment trial ni VP Sara nga gitakdang sugdan na sunod buwan.
Kon mosumiter og lista si VP Sara sa mga ebidensiya ug mga testigo nga mohimakak sa mga pasangil batok niya, nagpasabot nga andam na siya sa husay. Nga posibleng tinuod ang pasalig nga human niya gi-isnab ang House Justice Committee panalipdan nang iyang kaugalingon atubangan sa Senado.
***
Kon dili mosumiter og lista, nagtimaan nga padayong modangop si VP Sara sa walay kinutoban nga technicalities nga gibalikbalik sa iyang mga abogado ug abogada aron kapugngan ang pagsugod sa husay unya sa Hulyo 6:
• Nga dili angayng himuon ang husay kay nalapas ang iyang katungod sa due process ug ang usa ka tuig nga pagdili sa pagpasaka og bag-ong impeachment complaints batok niya; ug
• Nga nag-ung-ong pang iyang petisyon sa Korte Suprema nga nagkuwestiyon sa constitionality sa House impeachment proceedings.
***
Mahibaw-an na karong adlawa kon isog, masaligon ba sa iyang depensa ug tinud-on bang VP Sara nga iyang atubangon ang senator-judges aron suklan ang giisip nga politikanhong pagpanggukod sa administrasyon ni Presidente Ferdinand Marcos Jr. batok niya.
O, sama sa gihimo sa iyang amahan ug mga igsuon, mokakak. Maayo lang sa hudlat ug paukyab pero motalaw inig abot sa gitakdang engkuwentro. Duna kitay ideya unsay nakapakurog niya: Kon makabuylo ang impeachment trial, maablihan ang bank accounts ug ubang mga ebidensiya batok niya ug mohagsa ang iyang ambisyon nga mag-presidente sa 2028.
- Latest
