Mayorya handa sa maruming balak ni Cayetano
MANILA, Philippines — Handa ang majority bloc ng Senado na pinamumunuan ni acting Senate President at Pro Tempore Sherwin Gatchalian sa anumang maruming balak ni Sen. Alan Peter Cayetano sa special session ng Senado, ayon kay Sen. Panfilo Lacson.
Sinabi ni Lacson na habang kinikilala ng halos lahat - maliban kay Cayetano at iilang kaalyado nito - si Gatchalian bilang lider ng Senado, ipinakita na ni Cayetano na kaya niyang gawin ang kahit ano upang kumapit sa “puwesto.”
“Nakahanda kami sa mga contingencies in case mangyari yan na manggugulo siya. Meron kaming pinag-uusapan, di ako at liberty to divulge. ‘Pag nag-uusap kami sa majority bloc ngayon ‘yan isa sa amin pinag-usapan. ‘Yan emphasize ko, huwag i-underestimate kasi capable ang tao na ‘yan gumawa ng maski anong gulo. He doesn’t care about the institution, he only cares about himself,” ani Lacson sa panayam sa DZBB radio.
Nang tanungin tungkol sa posibilidad na agawin ni Cayetano ang podium sa espesyal na sesyon, sinabi ni Lacson na “capable” itong gawin ni Cayetano dahil “mahilig siya sa ganyan.”
Aniya, maging ang ilan sa mga kaalyado ni Cayetano sa ngayo’y minority bloc ay hindi na rin gaanong lantad sa pagsuporta sa kanyang pag-angkin sa pagkapangulo ng Senado.
“Magising na sana sa katotohanan ito ang realidad. Maski sinigaw niya sa buong mundo siya ang SP walang sumusunod sa kanya. Napansin ninyo tahimik ang iba niyang kasama ang dating maingay na kasabay niya wala na ring comment. Narealize na rin nila siguro ang reality tapos na boxing, ‘wag na insist. Although walang permanent Senate President, pero ‘di na siya ang SP for all intents and purposes,” aniya.
Muli ring iginiit ni Lacson na kapag natuloy ang espesyal na sesyon, dapat umiwas si Cayetano sa paggawa ng gulo sa mga proceedings.
“Huwag manggulo. Maging mga senador, makilahok. Tapos kung anong pinaglalaban, sa floor namin pag-usapan, huwag sa FB. ‘Di namin siya madedebate sa FB. Ang puwede, magdebate kami sa plenaryo, hindi sa FB,” aniya.
- Latest
