Sara, No.1 sa pag-iwas sa accountability – Gadon
MANILA, Philippines — Tahasang sinabi ni Presidential Adviser for Poverty Alleviation(PAPA) Secretary Larry Gadon si Vice President Sara Duterte na “No.1” sa pag-iwas sa accountability na taliwas sa kanyang mensahe sa Araw ng Kalayaan.
Ayon kay Gadon, panay iwas sa accountability ni Duterte na nahaharap sa impeachment proceedings. Aniya, sa impeachment trial umano mabibigyang-linaw ang mga alegasyon at ebidensyang nakalap ng Kamara laban kay Duterte.
Sa kanyang Independence Day message, nanawagan si Duterte sa mga Pilipino na panindigan ang katotohanan, pananagutan, at mabuting pamamahala.
Pinabulaanan din ni Gadon ang pahayag ng bise presidente na umano’y walang sapat na ginagawa ang administrasyon ni Pangulong Ferdinand Marcos Jr. para sa mahihirap.
Binigyang-diin niya ang mga programa ng pamahalaan para sa mga magsasaka at iba pang sektor, kabilang ang pamamahagi ng mga titulo ng lupa, pagtatayo ng mga post-harvest facilities, pagbibigay ng farm implements, at subsidiya, gayundin ang pagpapalawak ng mga benepisyong pangkalusugan para sa mga Pilipino.
Iginiit ni Gadon na maraming programang ipinatutupad ang administrasyon upang mapabuti ang kalagayan ng mga mahihirap at palawakin ang access sa serbisyong pangkalusugan.
- Latest
