10 batikang abogado sa Sara trial, ipinakilala

MANILA, Philippines — Ipinakilala ng Kamara ang 10 de-kalibreng mga pribadong prosecutors upang tumulong sa prosecution panel sa isasagawang paglilitis ng Senate Impeachment Court laban kay Vice President Sara Duterte.

Nitong Huwebes, pormal na ipinakilala ni Justice Chairperson Gerville “Jinky Bitrics” Luistro, lead prosecutor ng 11-member team ng Kamara, ang unang batch ng mga private prosecutors.

Binubuo ito ng mga kilalang beteranong litigators, dating abogado ng gobyerno, law firm partners, at legal academics na magpapalakas sa presentasyon ng Articles of Impeachment. Nilinaw naman ni Luistro na mananatili sa Kamara ang kontrol sa prosecution team.

Ang unang batch ay mula sa tatlong ­respetadong law firms: PECABAR Law, Kapunan and Castillo Law Office, at Saligal Law. Ang kanilang mga miyembro ay may karanasan sa high-profile litigation, prosekusyong kriminal, corporate disputes, arbitration proceedings, at kumplikadong kaso sa komersiyo.

Kabilang sina Marforth Fua – Managing Partner ng PECABAR Law at dating Assistant Presidential Legal Counsel sa ilalim ni ­Pangulong Ferdinand Marcos Jr.; Lorna Kapunan – ­Veteran trial lawyer, founder at senior partner ng Kapunan and Castillo Law Offices; Amando Virgil Ligutan – Cebu-based lawyer, Managing Partner ng Saligal Law, at Senior Lecturer sa UP College of Law.

Kasama rin sa team ang PECABAR partners na sina Erwin Matib at Justine Anna Lamarca, senior associate James Bryan Ibrahim; Kapunan and Castillo senior partner Sonya Margarita Benemerito Castillo, junior partner Deanne Melissa Lorenzo-Singian, co-managing partner Bettina Zamora, at Atty. Lino Chris Kapunan.

Ayon kay Luistro, boluntaryo o pro bono ang serbisyo ng mga private prosecutors. Tutulong sila sa 11-member prosecution panel ng Kamara sa pagpriprisinta ng mga testigo, ebidensya, pleadings, at istratehiya sa paglilitis.

Binanggit naman ni Akbayan Partylist Rep. Jose Manuel “Chel” Diokno na matagal nang tradisyon ang partisipasyon ng mga pribadong prosecutors sa impeachment trials. Aniya, nagboluntaryo rin siyang prosecutor noong impeachment trial ni dating Pangulong Joseph Estrada.