Kaguliya sa Senado
Paita ni Senador Jinggoy Estrada. Nakapiyansa og ?90,000 (kay wala magkuwang og kuwarta) para sa kasong graft pero mapriso gihapon kon mogawas nang arrest warrant sa plunder nga (bisan nagsobrang kuwarta) dili kapiyansahan.
Ikatulo na kini niyang plunder sa niaging 25 ka tuig. May sukaranan ang mga panghinaot nga matsambahan na og konbikto human naabsuwelto sa nahaunang plunder cases sa 2001 ug 2014. Mas katuohan nga ang mga buslot sa sistema sa hustisya maoy nakapalusot niya. Dili ang pangangkon nga gigukod lang tungod sa maisugong pagbarug sa iyang prinsipyo.
Daotang balita sab para sa majority bloc nga gipangulohan ni Senate President Alan Peter Cayetano. Hanap ang kahigayonan nga makatambong si Estrada sa sesyon ugma, Lunes, aron makatabang sa pag-aprobar sa lagda nga motugot sa mga sakop nga nagtago ug mapriso nga makaapil sa sesyon online.
Kay mahimong mapriso na si Estrada sa Quezon City Jail male dormitory kon moluwat og arrest warrant ang 5th Division sa Sandiganbayan. O mas unang mapatuman ang 90 ka adlaw nga preventive suspension tungod sa iyang giatubang nga mga kasong graft ug plunder.
Alas-5 na ugma sa hapon, sa gitakdang pagsugod sa sesyon, mahibaw-an nilang Cayetano ug kaubanan may sukaranan ba o paukyab lang ang mga pangangkon nga labing menos duha nila ka mga kauban ang mobalhin sa grupo ni Senate Minority Leader Tito Sotto.
Klaro ang clues kinsay mamalhin: Suod ni Migz Zubiri ug kapartido ni Sotto sa Nationalist People’s Coalition (Loren Legarda); ug absent sa sesyon niadtong Martes nga na-adjourn tungod sa walkout sa minority bloc (Chiz Escudero).
Tulo ka dagkong kausaban kon mapulihan si Cayetano ni Sherwin Gatchalian:
•Lapad nga lahugay sa mga komitiba, mahimong mabalik si Ping Lacson sa Blue Ribbon Committee, imbes tukuron ang subcommittee sa flood-control scam ni Rodante Marcoleta;
•Mas sayo kay sa Hulyo 6 (nga gitakda nga Cayetano) ang sugod sa impeachment trial ni Bise Presidente Sara Duterte; ug
•Ma-imbestigar na sa mga senador kon silang Cayetano ug kaubanan bay utok sa peke nga pag-atake ug pinusilay sa Senado sa gabii sa Mayo 13 nga niresulta sa pag-ikyas ni Bato dela Rosa sa kadlawon sa Mayo 14.
- Latest
