Kandidato sa pagka-kagawad, nagbigti

NORTH COTABATO, Philippines — Pinaniniwalaang problema sa pamilya ang dahilan kung bakit kusang nagpasalubong kay Kamatayan ang isang 48-anyos na ginang na tumatakbo sa pagka-barangay kagawad makaraang magbigti sa kanilang bahay sa Barangay Poblacion 6, Midsayap, North Cotabato kamakalawa.

Nakilala ang biktima na si Judith Postrado, 48-anyos, may asawa at residente ng nasabing lugar.

Dakong alas-11:30 ng umaga ng makita ng asawa nito na si Joseph Rex Diolaso Postrado, 48-anyos, isang tanod sa barangay ang misis nitong wala nang buhay sa loob ng kusina ng kanilang bahay na nakabitin sa kisame gamit ang nylon cord na itinali sa leeg nito.

Personal na problema umano ang posibleng dahilan ng pagpapakamatay ng biktima matapos umano nitong mahuli ang mister na may kalaguyo.

Duda naman ang pamilya ng babae sa paraan ng pagpapakamatay ng biktima dahil madalas umanong minamaltrato ito ng mister.

Patuloy na inaalam ng pulisya kung may foul play sa naturang insidente.