Cavs pilde na sab

CEBU, Philippines – Mipatuasik og 30 puntos si Bojan Bogdanovic sa dihang ang Indiana Pacers mibangon gikan sa 17 puntos nga pagkalubong sa halftime aron maangkon ang 92-90 nga kadaogan batok sa Cleveland Cavaliers ug ingon man makuha ang  2-1 nga bentaha sa ilang ‘best-of-seven’ NBA first-round playoff series kagahapon didto sa Banker's Life Fieldhouse sa Indianapolis, Indiana.

Ang Cavs nagbitbit og 39-0 record sa regular season sa higayon nga sila maoy naglabaw human sa tulo ka kuwarter. Ila kining namintinar niadtong Game 2.

Apan ning higayona, gimakmak sila sa Pacers.

Gipahimuslan og maayo sa Pacers ang pagkolapso sa Cavs sa final half aron pagkulit og mahinungdanong daog sa gabii diin si LeBron James miduyog ni Michael Jordan isip mao lang mga players nga nakamugna og 100 ka double-double sa kasaysayan sa NBA playoffs.

Si James mitapos uban ang 28 puntos ug 12 ka rebounds, apan dili kini igo aron pugngan ang Cavs nga  makatilaw sa labing una nilang pilde human gikontrolar ang duwa sa nag-unang tulo ka kuwarter

Didto sa Washington, si Bradley Beal miratsada og 21 sa iyang 28 puntos sa first half, samtang si John Wall mibubo og 28 puntos ug 14 ka assists sa dihang ang Wizards mibawos sa Toronto Raptors, 122-103. Hinuon ang Raptors pa gihapon maoy abante sa ilang serye, 2-1.

Ang Wizards mitukod og solidong depensa aron pagpuwersa sa Raptors ngadto sa 19 ka turnovers nga ilang gigaling ngadto sa 28 puntos.

Si DeMar DeRozan dunay 23 puntos, samtang si Kyle Lowry miiskor og 19 sa Raptors.

Sama sa Wizards, ang Milwaukee Bucks nakabawos sab sa Boston Celtics, 116-92 sa Game 3.

Si Khris Middleton dunay 23 puntos, samtang si Giannis Antetokounmpo mihipos og 19 puntos alang sa Bucks nga misanta sa duha ka sagunson nilang pilde sa Celtics.

Sila si Eric Bledsoe ug Jabari Parker midonar og 17 puntos matag usa alang sa Bucks nga wala mitugot sa Celtics og bisan usa ka field goal sud sa 11 minutos sa first half.

Si Al Horford mikolekta og 16 puntos alang sa Celtics nga nalat-an og 23 puntos sa halftime ug igo lamang nakasikit ngadto sa 76-62 sa nahibiling 3:06 sa ikatulong kuwarter.