Kagawad itinumba sa Cebu

MANILA, Philippines – Isang araw bago magsimula ang election period para sa barangay at Sangguniang Kabataan elections ay isang kagawad ang itinumba ng armadong kalalakihan sa Cebu kaninang madaling araw.

Ayon sa ulat ng Philippine News Agency, nakilala ang biktimang si Neil Abella na kagawad ng Brgy. San Isidro sa bayan ng San Fernando.

Pinaulanan ng bala ang sasakyan ni Abella bandang ala-1 ng madaling araw. Kasasakay pa lamang ng biktima at ng kaniyang kasamahang si Eric Alesna nang paputukan sila ng mga suspek.

Samantala, nagpapagaling naman si Alesna na tinamaan ng bala sa braso.

Tinitingnan namang anggulo ng mga awtoridad ang pagkakasangkot ni Abella sa ilegal na droga.

Pinaniniwalaang may koneksyon si Abella kay self-confessed drug lord Franz Sabalones.

Natagpuan ng mga awtoridad sa sasakyan ni Abella ang drug paraphernalia, disposable lighter, at mobile phone.