EDITORYAL - Narco-list sa Visayas

Kulbahinam kaayo kining estorya nga may listahan na sa mga narco-politicians dinhi sa Sugbo ang Department of Interior and Local Government.

Nigawas kini nga estorya human nga si Gobernador Hilario Davide III miabot gikan sa usa ka panagtigum sa Malacañang nga gipatawag ni Presidente Duterte sa nakalabay nga semana.

Maayo unta og masugdan na kini pagpublikar kun si kinsa kining maong mga politiko nga nagdawatan og protection money o campaign funds nga gikan sa kita sa illegal drugs.

Magkinto na gyud kining mga opisyal nga sa dugay na nga panahon nag-enjoy niining kuwarta gikan sa drugas kay nailhan na sila ug mahimo man sila nga pasakaan og kaso sa administrasyon ni Duterte.

Anha pa sila magmahay unya kun ma-Tukhang na sa ilang mga opisina. Kun mahitabo na kini, makahinumdom na kini sila sa ilang papel isip mga pinili. Apan mauwahi na unya ang tanan.

Ingon na gyud niini kadako ang kanser sa katilingban, ang ilegal nga drugas. Dili na mga sibilyan lang ang nalambigit sa ilegal nga mga kalihukan, kun dili, hasta na ang mga anaa sa gobiyerno, polis man o elected officials ug uban pa.

Kini sila maoy nakaingon kun ngano nga nakagamot og maayo ang ilegal nga drugas, mao nga angayan lang nga sila panglaruton ug ibton sa ilang mga puwesto aron dili na mosalingsing pa ug mamunga. Samtang tuod nga ingon sa nauwawan si Duterte nga wa niya mapuo ang krimen ug ilegal nga drugas sulod sa gisaad niyang panahon, apan napadayag man usab niya ngadto sa katawhan ang tinud-anay nga sitwasyon. 

Kining pagbaton sa listahan sa mga angay pitulon nga mga opisyal sa gobiyerno, maghatag kini og dugang pagsalig sa katawhan ngadto ni Duterte ug sa iyang administrasyon.  Apan kinahanglang sigurohon nga unta kun ma-expose na kining mga narco-politicians, makasohan ug masilotan unta dayon sila sa dili pa matapos ang termino ni Duterte aron dili na makakandidato pag-usab.