2 tulak utas sa shootout

LEGAZPI CITY, Albay, Philippines - Bulagta ang dalawang notoryus na drug suspek makaraang kumasa at makipagbarilan sa mga pulis sa inilatag na buy-bust operation sa loob ng boarding house sa Purok Lapu-Lapu, Barangay Pa­ting sa Masbate City, Masbate kamakalawa ng madaling araw. Isinugod pa sa Masbate Provincial Hospital pero dineklarang patay sina Elmer “El El” Orcullo, 40, ng Brgy. Kinamaligan, Masbate City; at Joe R. Santander, 51, ng Maigo, Lanao Del Norte. Isinagawa ang drug operation ng mga operatiba ng Regional Anti Illegal Drug Special Operation Task Group, Masbate PPO, Provincial Public Safety Company at Masbate City PNP laban sa dalawa subalit nauwi sa shootout makaraang pumalag at tinangkang makipagbarilan nina Orcullo at Santander. Narekober sa dalawa ang 5 plastic sachet ng shabu, cal 22 revolver at mga drug paraphernalia.