Katuohan ba si Matobato?
Usa sa mga paagi pagtino kun katuohan ba si Edgar Matobato sa iyang mga pasangil batok ni Presidente Rodrigo Duterte ug mga sakop sa iyang pamilya ug ubang mga alyado mao ang pagsusi sa mga ngalan, mga dapit, mga petsa ug ubang mga detalye nga iyang gipabuhagay atol sa imbestigasyon sa Senado niadtong Huwebes.
Usa sa iyang pasangil nga nakadapit sa mga Sugbuanon mao ang pagtumbok ni Davao City Vice Mayor Paolo Duterte nga maoy utok sa pagpapatay sa Sugbuanong negosyante nga si Richard King tungod sa panag-ilog nila og babaye, nga nakaduhig niya ug nakapugos niya pagtago sa Sugbo, Leyte ug Samar, ug pagdangop sa Commission on Human Rights (CHR) ug Department of Justice (DOJ).
* * *
Ang pasangil ni Matobato nakadugang sa mga teyoriya sa kapolisan nga mahimong gipatay si King tungod sa mosunod niyang mga panagsungi uban sa: Tribu sa Boracay kansang pangulo gipatay atol sa pagtukod sa iyang hotel niadtong 2013; RTC Judge Agapito Hontanosas nga iyang gipasanginlang nangayo og P250,000 gikan sa iyang gikiha nga magtiayong Nelson ug Lucy Go sa Sugbo niadtong 2002; ug kanhi Lapu-Lapu City Mayor Arturo Radaza nga iyang gipasanginlang nangilkil niya niadtong 2007.
Gisukwahi sab ni Matobato ang pasangil ni Presidente Duterte niadtong Hunyo ning tuiga nga gipatay si King tungod sa iyang kalambigitan sa ilegal nga drugas.
* * *
Wa maklaro ang ngalan sa babayeng negosyante nga giingon ni Matobato nga giilogan nilang Paolo Duterte ug King. Nakalitok hinuon siya sa ngalan nga “Ochoa.” Ang gipatawag sa National Bureau of Investigation (NBI) mao si Helen Sy Chua, nga niangkong kababata ug kasosyo ni King sa negosyo apan nihimakak nga may romantiko silang relasyon, ug iyang anak nga si Wilbert Reagan Jo Chua, 33, ang supplier sa hollow blocks sa iyang hotel sa Boracay.
Patay na hinuon ang duha: Ang inahan nahiagom sa kanser sa utok; ug ang anak gipusil patay sa duha ka armadong tawo nga nagmotorsiklo sa Davao. Gawas sa saad pagsusi kun nahilambigit ba sa kamatayon ni King, wa pa sab masulbad sa kapolisan ang kamatayon ni Wilbert.
* * *
Kun si Matobato ang tuohan, naduhig lang sab sa kaso si Police Superintendent Leonardo Felonia, kanhi hepe sa Davao Regional Intelligence Unit. Apan ang mga imbestigador kumbinsido nga si Felonia nipapatay ni King pagtuman sa sugo sa gikasungi nga babayeng negosyante.
Si Felonia nga suod ni Duterte nisurender ug nagpakitabang niya. Human gitanggong sa Kampo Crame, gibalhin siya sa Davao. Niawhag siyang ibalhin ang husay sa kaso ngadto sa kaulohan kay nahadlok sa iyang seguridad sa Davao.
Niuyon unta niya ang Korte Suprema apan niusab sa hukom ug nitakda nga sugdan na ang husay sa kaso sa Davao karong Nobiyembre ug Disyembre.
- Latest
