Padayong pagbarato sa lana

Sa di pa mahinayak ang higanteng mga kompaniya sa lana dinhi sa ato sa pagpangita na sab og taphaw nga sukaranan sa pagpugong sa padayong pagtidlom sa presyo sa lana, niay mahinungdanong balita: Nitibugsok pag-ayo ang presyo sa lana sa merkado sa kalibotan karong semanaha tungod sa padayong pagsulbong sa produksiyon sa lana sa Estados Unidos.

Sa ato pa, segurong mo-us-os na sang presyo sa mga produkto sa lana sunod semana. Gawas lang kon hapit na mabasiyo ang tangke sa imong sakyanan, mas maayo tingaling maghuwat unya sa Martes sa buntag, nga maoy kasagarang iusab sa presyo sa gasoline stations, una magpatubil.

* * *

Sobrang suplay ang nakapahagsa sa presyo sa lana sa merkado sa kalibotan sukad pa sa Hunyo sa niaging tuig. Kanus-a nisulbong pag-ayo ang produksiyon sa lana sa Estados Unidos ug ubang kanasuran nga di sakop sa Organization of Petroleum Exporting Countries. Kay di man mga sakop sa OPEC, di sila madiktahan sa cartel sa paglaslas sa ilang produksiyon aron mapataas pagbalik ang presyo sa lana.

Bisan ang OPEC nagdumili paglaslas sa ilang produksiyon tungod sa kabalaka nga mailog sa Estados Unidos ug ubang mas agresibong mga nasud ang ilang bahin sa kalibotanong merkado. Nagsalig ang Saudi Arabia ug OPEC sa ilang alas: Mas barato ang ilang lana.

* * *

Nagsalig ang OPEC nga ang Estados Unidos ug ubang di nila sakop, nga mas dako og gasto sa produksiyon, maoy unang mamilok. Kay ang padayong pagtidlom sa presyo sa lana mas dako og kadaot nga mahatag ngadto sa bag-o nilang mga karibal. Gisamotan pa gyod nila og duot pinaagi sa paglaslas sa ubos nang daan nga presyo sa ilang lana.

Tuod man, may mga timaan nga nimenos ang produksiyon sa Estados Unidos. Nga nisangpot sa dasmag-dasmag nga pagsaka sa presyo. Gipakaingon sa mga tigpaniid nga sakto ang OPEC. Nga naleksiyon nang Estados Unidos nga di makaayo ang paghilas-hilas paghagit sa kadominante sa OPEC.

* * *

Apan sa ikaduhang sunodsunod nga semana gipamatud-an sa Estados Unidos nga wa silay tinguha pagpamenos sa ilang produksiyon. Nagsalig sa mas bag-o nilang teknolohiya nga mas paspas kay sa karaang sistema sa OPEC sa pagpausbaw ug pagpahiyos sa ilang produksiyon. Labihan kamasaligon sa mga Amerikanhon nga naapil na gani sa nagpadayong kampanyang presidensiyal ang kahigayonan nga mamaligya pagbalik ang Estados Unidos og lana ngadto sa ubang kanasuran.

Tungod ini, mas nilig-ong pangagpas nga motidlom ang presyo sa lana hangtod sa tuig 2020. Nga gipanghinaot nga makapaubos sa mga presyo ug plitehan. Di hinuon positibo ang tanang epekto sa baratong lana. Sa labing unang higayon sa kapin sa dekada, nitidlom ang dollar remittances sa Overseas Filipino Workers sa Agosto tungod sa pagluya sa ekonomiya sa Middle East.