Kalabad sa Kongreso

Ang labing uwahing kayagaw sa pagtakda sa piniliay sa Sangguniang Kabataan maoy laing ebidensiya sa kabanga sa pagtuman sa batakan nilang gimbuhaton--ang pagpanday og mga balaod. Maayo silang manghilabot sa mga di unta ilang responsibilidad, apan kasagaran di magkadimao kon ang pag-usab sa kuwestiyonableng mga balaod o paghimo og bag-ong mga balaod nay hisgutan.

Abtik ang mga senador ug mga kongresista nga mangimbestigar og bisan unsang eskandalo, pipila nila maayo sang magpasiugda og ilang kaugalingong eskandalo, kasagaran eksperto nga mamolitika, pulos ganado nga manghilabot sa pagpatuman sa mga proyekto ug hapit tanan determinadong madugangan ang ilang bahin sa nasudnong budget. Apan ang ilang balaudnon pag-usab sa SK wa magkadimao.

***

Hagbay rang awhag sa mga sakop sa Kongreso paghimo sa SK nga tinuorayng representante sa mga batan-on, moandam nila sa mas dagkong gimbuhaton pag-alagad sa katawhan ug pagpalambo sa nasud. Apan naghuwat sila nga hapit nang eleksiyon sa SK niadtong Oktubre 2013 una nakapasar sa balaudnon pagsuspenso sa piniliay.

 Ang mga senador ug mga kongresista ra sab maoy nagtakda nga ang sunod nga eleksiyon sa SK mahimo sa bisan unsang petsa gikan sa Oktubre 28, 2014 hangtod sa Pebrero 23, 2015. Apan natakda na lang sa Commission on Elections ang bag-ong petsa sa piniliay sa SK unya sa Pebrero 21, wa pay bisan unsang balaudnon pag-usab sa SK nga napasar ang Kongreso.

***

Naghuwat ang mga sakop sa Kongreso sa pahibawo sa Comelec nga nagsugod na gahapon ang election period alang sa SK elections, ug busa gisugdan na og patuman ang gun ban ug ang pagdili sa pagsugod sa bag-ong mga proyekto ug sa pagbalhin sa mga kawani sa gobyerno, una nagkarakara pagpasalig nga mopasar na sab og bag-ong balaudnon nga motakda na lang gyod sa sunod nga piniliay sa SK sa Oktubre 2016.

Bisan wa pay balaudnon nga naumol, nipahibawo nang kadagkoan sa Senado ug sa House of Representatives nga nagkasabot na sila pagkanselar sa piniliay karong tuiga. Way arang nila. Apan nahasol ang tibuok nasud sa ka wa nilay klaro.

***

Naapil sa gisugyot nga kausaban ang pag-isa sa pangedaron sa mga sakop sa SK gikan sa 15 ngadto sa 17 karon ngadto na sa 18 ngadto sa 24 aron makasud na og mga kontrata. Gisugyot sab nga ang mga pangu sa SK di na palingkuron sa mga bay balaoranan sa mga lungsod, dakbayan ug lalawigan ug did-an pagdagan ang mga anak sa mga mayor ug mga gobernador.

Mahimong makatabang sa SK ug sa mga batan-on ang gitun-an nga kausaban. Apan ang way kinutoban nga katapolan ug kalangayan sa mga senador ug mga kongresista naghatag og nangalisbo nga sumbahan ngadto sa mga batan-on nga nagsunod nila.