Eksperimento sa trabaho
Way apil ang Sugbo ug ubang lalawigan gawas sa Metro Manila sa 4-day work week nga gitun-an sa Civil Service Commission (CSC) alang sa mga buhatan sa gobiyerno. Ang labing dinaliang katuyoan sa pagbanhaw sa sugyot mao ang nagkagrabe nga kahimtang sa trapiko sa kaulohan. Sama sa naandan, ang panghunahuna sa nasudnong gobiyerno mao nga Metro Manila ray naproblema sa trapiko.
Maong nisugyot si House Labor Committee Chairman Karlo Nograles nga ipatuman ang 4-day work week sa tibuok nasud. Kay samtang naproblema sang ubang dagkong dakbayan sa trapiko, mas mapuslanon ang eksperimento sa Mindanao nga nagnihit na sa kuryente ug nag-atubang og mas dakong krisis sa elektrisidad sunod tuig.
***
Duha ang kapilian sa mga buhatan sa gobiyerno nga moboluntaryo pag-apil sa eksperimento: Lunes hangtod sa Huwebes o Martes hangtod sa Biyernes ang trabaho, sugod sa alas-8 sa buntag hangtod sa alas-7 sa gabii, uban ang usa ka oras nga pahuway sa tingpaniudto. Tulo ka adlaw nang pahuway (Biyernes, Sabado ug Domingo, o Sabado, Domingo ug Lunes) apan matagbaw gihapong panginahanglan sa 40 ka takna nga trabaho matag semana.
Gitataw hinuon sa CSC ang mosunod nga mga panginahanglan sa mga mopatuman sa 4-day work week: Online presence nga makaatiman sa dinaliang mga panginahanglan sa mga magbubuhis, one-stop shop sa mga pangalagad ug 24/7 nga call center.
***
Napatuman na sa CSC ang susamang eksperimento, ang flexitime, pila ka tuig ang nilabay. Gihatagan og kapilian ang mga kawani sa gobiyerno–ang motrabaho og mas sayo, makapahuway sab og mas sayo; ang uwahi nga mosud mas dugay sab nga makapauli.
Niapil sa eksperimento ang pipila ka nasudnong buhatan sa Sugbo, apil nang mga kawani sa Bureau of Internal Revenue. Apan napamatud-ang wa motakdo sa ilang trabaho. Kay bisan lugwayan pang mga oras sa trabaho, mabawo gihapon ang mobayad nga mga magbubuhis kay kutob ra man sa alas-3 sa hapon ang mga transaksiyon sa kasagaran sa mga bangko.
***
Bisan wa maapil ang local government units sa orihinal nga eksperimento, gisagop ni sa Kapitolyo sa Sugbo. Nangangkon si Board Member Arleigh Sitoy nga napuslan sa mga kawani sa Kapitolyo nga kanunayng magsagubang sa pagkabara sa trapiko ang flexitime hangtod karon.
Nitataw hinuon si Sitoy nga mapugos ang mga buhatan sa gobiyerno ug pribadong mga kompaniya pag-usab sa ilang naandang sistema tungod sa paspas nga paglambo sa mga teknolohiya. Nangagpas siya nga magkadaghan ang mga buhatan sa gobiyerno nga masuyop sa shopping malls kay maoy kasagarang gipunsisokan sa katawhan. Sama nga magkadaghan ang mga gimbuhaton sa mga buhatan karon nga, tungod sa kahuot sa trapiko, mas sayon ug mas paspas nga mahimo kun adto na lang manukad ang mga kawani sa ilang mga pinuy-anan.
- Latest
