Barko nasunog: 3 kritikal
LUCENA CITY, Quezon, Philippines - Tatlong tripulante ng cargo vessel ang malubhang nasugatan matapos na sumabog at tuluyang nasunog habang nakadaong sa pantalan ng Barangay Cotta, Lucena City, Quezon kahapon ng madaling araw.
Naisugod sa Quezon Medical Center ang mga biktimang sina Romy Pabol, Rodolfo Finangcol, at Davide Fabella na pawang residente ng Romblon.
Sa inisyal na pagsisiyasat ng Bureau of Fire Protection sa pangunguna ni City Fire Marshall S/Insp. Adrian de la Cruz, nakatakdang maglayag ang M/V Banton Liner 10 patungo sa Romblon para magdala ng gasolina, krudo, LPG tanks at mga dry goods nang magkaaberya ang makina nito.
Nabatid na pinaandar ang barko nang biglang nag-spark ang ilalim na bahagi ng makina hanggang sa sumabog.
Nagtalunan sa tubig ang mga tripulante patungo sa pampang habang nilalamon ng apoy ang barko habang patuloy naman ang imbestigasyon.
- Latest
