EDITORYAL - Buhis: Dugo sa Gobiyerno

Ang buhis maoy dugo sa atong gobiyerno aron kini modagan, paghatag sa mga batakang serbisyo sa katawhan gikan sa mga imprastraktura, panglawas, edukasyon, food security, depensa ug uban pa.

Apan mag-unsa man ang usa ka nasud kung ang kinabag-an sa katawhan nga nagbayad mao lang ang mga gagmay nga mga mamumuo samtang ang mga dagko og sweldo o kita sa negosyo di man mobayad sa hustong buhis.

Kung ang mga ordinaryong vendors sa merkado mobayad gani og tiket o arkabala sa ilang usa ka plangganita nga baligyang kamatis, kana usab untang mamaligya og mga real states, mga maningil og professional fees nga usahay moabot og minilyon ka pesos ug uban pa.

Ang mga ordinaryong baggers, sales ladies, janitor, collectors ug uban pang mga gagmay kaayo og sweldo, ang uban below minimum pa ug walay benepisyo, awtomatikong kuhaan ang ilang sweldo kada tingkubra kay bayad kuno sa buhis.

Apan nahibaw-an sa Bureau of Internal Revenue nga daghang mga propesyonal nga wala magbayad og hustong buhis. Sila kadtong mga tawong dagko og sweldo apan wala makatultol asa ang BIR.

Ang mga yanong taxpayers mag-commute lang samtang kadtong mga tikasan sa buhis, de –awto, makapangutana ta kung asa na man ang hustisya ani?

Kining gihimong bag-ong campaign posters sa BIR nga nagpakitang ang usa ka maestra nagpas-an sa usa ka doktor, kapanghinuklogan sa tanan.

Ang kaugmaon sa nasud wala lang nag-agad sa kabataan kondili sa buhis usab diay.