Pasiunang tabang sa Norte

Walo na ka trak sa mga pagkaon ug binotelyang tubig ang naapud-apod sa kapin sa duha ka libo ka pamilya sa amihanang Sugbo nga apil sa labing grabeng naigo sa bagyong Yolanda. Ang pasiunang relief goods kabahin sa nagbaha nga hinabang sa mga Sugbuanon nga nadawat sa Kapamilya Relief Campaign alang sa mga biktima sa linog sa Bohol ug sa Sugbo.

Hinaot nga makasabot ang mga Bol-anon nga ang hinabang alang unta nila natanggong sa Sugbo tungod sa kalisod sa transportasyon nga nasamotan sa sunudsunod nga paghasol sa mga bagyong Wilma ug Yolanda. Hinaot nga makasabot sab ang nanghatag sa mga hinabang nga nagkinahanglan sab og dinaliang pagkaon ug tubig ang mga biktima sa atong kaugalingong tugkaran.

***

Daghang salamat sa manggihatagon nga mga Sugbuanon. Nga wa pa gani mahuman sa pagtabang sa mga biktima sa linog sa Bohol nagsugod na sab og hatod sa ilang mga hinabang alang sa mas daghan nga mga biktima ni Yolanda. Di lang sa amihanang Sugbo kon dili apil na sa mas naggusbat nga silingan natong mga dakbayan ug kalungsoran sa silangang Kabisay-an.

Daghan nang hinabang nga among nadawat sa ABS-CBN Broadcast Complex sa Jagobiao, Mandaue City. Ablihan na karong Lunes sa buntag ang ABS-CBN booth sa Fuente Osmena sa Dakbayan sa Sugbo nga dumalahon sa wa say kakapoy natong mga boluntaryo.

***

Mas sayon ug mas dali nga mapada sa mga biktima sa katalagman ang imong hinabang kon puston nang daan agad sa naandan sa Kapamilya Relief Campaign nga duha ka kilong bugas humay, tulo ka lata nga sardinas o corned beef o meat loaf ug upat ka putos nga noodles.

Mahimo sang puston nang daan ang mga binotelyang tubig: Kon gagmay, tag-unom ka botelya sa matag pamilya; kon dagko, tagduha o tagsa matag pamilya. Kon maputos nang daan ang mga hinabang mahatod dayon sa mga dapit nga nahitaboan ug mas sayon nga maapud-apod sa mga biktima.

***

Labing sayo nga nakapahuwam sa iyang dagkong trucks mao si Tony Montinola sa Basak Pardo kinsa gidasig ni Cebu City Councilor Dave Tumulak pagtabang sa paghatod sa pasiunang mga hinabang alang sa amihanang Sugbo. Gipakuyog sang Dave ang iyang ambulansiya ug paramedics aron pag-atiman sa mga biktimang nasamdan sa bagyo.

Daghang salamat sab sa Philippine Air Force nga nipahuwam sab sa ilang mga trak ug mga sundawo. Ug labing dakong pasalamat ngadto sa mga boluntaryo gikan sa Consolacion ug ubang mga pundok nga bisan nagsingabot na ug bisan mao pay pagbiya ni Yolanda wa pa gyod molunga sa matag adlaw nga pagpamutos, pagkarga, pagdiskarga, paghakot ug pag-apud-apod sa mga hinabang alang sa mga biktima sa linog sa Bohol ug karon sa bagyo sa Sugbo ug silangang Kabisay-an.

***

Email:[email protected]