Minilyon ka trolls

Kapin sa oras si Bise Presidente Sara Duterte nga nagbarug sa tugkaran, sa wala pa mosulod sa Quezon City Hall, nibalibad sa elevator ug nikatkat sa hagdanan paingon sa korte sa ikalimang andana nga nihikay sa iyang piyansa para sa giatubang nga kasong kriminal.

Duna untay igong kahigayonan ang iyang mga dumadapig sa Metro Manila sa pagtapok aron pagprotesta sa iyang giingong pagpanggukod sa administrasyon. Pero maihap ra sa tudlo ang nagpakita. Hain na man ang minilyon niya ka mga dumadapig nga masuk-anong nipasidaan nga ilang panalipdan si VP Sara?

Sukad giluwatan sa korte ang arrest warrant niadtong Biyernes hangtod sa pag-piyansa niadtong Sabado, walay mga protesta nga gilusad sa nagkalainlaing bahin sa nasud. Aron pagkondenar sa pagpadakop sa administrasyon ni Presidente Ferdinand Marcos Jr. sa ilang hinigugma nga pangulo, anak ug sumusunod sa kanhi presidente ug gikoronahan nang daan nga sunod nga presidente unya, o mas maayo sa dili pa, sa 2028.

Makabungog ang kahilom sa iyang politikanhong mga alyado, bisan sa duha niya ka igsuong lalaki, sa gidangatan ni VP Sara. Nakalitan ba lang o nanagana na?

Masaligon ang mga Duterte sa kadaghan sa ilang mga dumadapig nga niadto pa lang Enero 2024 gilusad nang kampanya pagpalagpot ni Marcos Jr. sa Malacañang pinaagi sa pag-awhag ni kanhi presidente Rodrigo Duterte sa kasundalohan ug kapolisan pagbakwi sa ilang suporta ni Marcos Jr. atol sa labing unang Maisug rally sa Davao City.

Hangtod nga napriso na lang si Duterte sa The Hague niadtong Marso 2025, walay polis ni sundawo nga nikuyog nila.

Mingaw ang tanang mga protesta nga gipasiugdahan sa mga Duterte. Nidaghan lang dihang nikuyog sa minilyon ka mga sakop sa Iglesia ni Cristo. Nga nagdumili hinuon sa pag-suporta sa ilang pag-apura nga makapuli na si VP Sara sa Malacañang.

Kon minilyon ang likes ug shares sa posts pag-aleluya ni VP Sara sa social media, nganong mas daghan mang langaw kay sa mga tawo sa ilang mga tapok? Ambot wala ba lang matarung pag-organisar. O tinuod ang pasangil nga ang nagsaba-saba mao rang troll army nga gigastohan sa China. Kansang pangilog sa West Philippine Sea gituohang matuman lang uban sa mga Duterte.