Nagdagan ikaw pahilayo
nagsawilik sa mga kasakit.
May pangos ang imong dughan
sa pagkadagma sa danglog nga
mga damgo. Ning imong pagbalik
nagtuo kang natun-as na
ang nasugdan tang tigbyaon
sa katawa diin ikaw ug ako
nagsaulog sa ritwal sa mga saad.
Nangawhat ang tumang kamingaw.
Saksi ang bintana sa atong payag
sa akong pagpanambo diin ang
gitalikdan mong baybayon naghuwat
kanimo. Ug ang lawod nahimong
papel sa mga luha. Ang mga bawod
wala makapapas sa imong mga tunob
kay bililhon ikaw ning nagpailob
kong kasingkasing. Ayaw na ko biyaig
usab. Ug nia, giagpas ko ikaw.
Gitunolan og buwak ug paglaom.
Gihawiran ko ang imong bukton
ug unya gisapupo ko ikaw!