Construction activity mohinay

CEBU, Philippines — Gipaabot nga mohinay ang construction activity sa unang unom ka bulan sa tuig 2025 sa Central Visayas. Kini gumikan sa election ban nga ipatuman sa gobyerno nga nagdili sa paghigayon og public work construction.

Kini ang gipanglantawan sa National Economic and Development Authority (NEDA-7) atol sa gipahigayon nga Regional Development Council (RDC) meeting kagahapong adlawa didto sa Kapitolyo.

“While the ban does not apply to private-sector construction, investors and developers may adopt a wait-and-see approach as they assess potential leadership changes and shifts in government priorities” sumala sa report sa NEDA-7.

Si Architect Neil Andrew Menjares, hepe sa policy formulation and planning division sa National Economic and Development Authority (NEDA 7) miingon nga human sa eleksyon, gipaabot nga makabawi ra sa second half sa tuig human sa restriction o election ban.

Base datus sa NEDA-7 sa tuig 2024, moabot sa 18, 076 ang gidaghanon sa mga konstruksyon sa niaging tuig, nikunhod kini gikan sa 18, 631 nga gidaghanon sa konstruksyon sa tuig 2023.

Sa susamang datus, 13, 516 sa mga natukod nga estruktura mga residential, mikunhod og 3.15% gikan sa 13, 955 sa tuig 2023.

Samtang sa non-residential, miabot sa 3, 551 ang natukod sa tuig 2024, diin mikunhod kini og 12.49% gikan sa 4, 058 nga datus sa tuig 2023. Ang value miubos usab sa 14.3%.

Nisaka usab og 30.70% ang gidaghanon sa mga nagpaayo sa ilang mga estruktura sa Central Visayas, diin nakita nga rason mao pagsaka sa gasto sa construction project ug mas gipili sa mga tag-iya sa mga estruktura nga mag-repair na lang kaysa magtukod og bag-o. — MEL BANAT NEWS