Sweden vs Belgium sa Challenger Cup opener
MANILA, Philippines — Bubuksan ngayon ang 2024 FIVB Women’s Volleyball Challenger Cup tampok ang pagtutuos ng Sweden at Belgium sa Ninoy Aquino Stadium sa Malate, Manila.
Sa alas-5 ng hapon magtatapat ang Sweden, nagreyna sa nakaraang European Golden League sa Ostrava, at Belgium matapos ang laban ng Puerto Rico at Kenya sa alas-3 ng hapon sa torneong inorganisa ng Philippine National Volleyball Federation (PNVF) sa pamumuno ni Ramon “Tats” Suzara.
Ipaparada ng Sweden si European Golden League Most Valuable Player Isabelle Haak kontra sa Belgium na tinalo ang Romania via straight sets para sa bronze medal ng torneo.
Sina star outside hitter Britt Herbots at middle blocker Silke Van Avermaet ang isasalang ng Belgium.
Bukas nakatakdang maglaro ang Alas Pilipinas at Viertnam sa alas-6:30 ng gabi.
Magkikita ang Czech Republic at Argentina sa alas-3 ng hapon.
Ang FIVB Women’s Volleyball Challenger Cup ay isang knockout tournament na nagtatampok sa walong koponan mula sa limang continental confederations na maglalaban para sa tiket sa elite FIVB Volleyball Nations League sa 2025.
Ang mga mananalo sa knockout quarterfinals ang papasok sa knockout semifinals.
- Latest