Ex-PBA player Joel Co misidlak na sab sa Core Pacific

CEBU, Philippines — Si kanhi PBA player Joel Co mihimo og kasikas sa dihang ang Core Pacific Group mipahagba sa kanhi way pildeng 2kcares.org, 69-54, alang sa ikaduha  nilang sagunson nga daog sa Sacred Heart Ateneo Alumni Basketball Athletic Association (SHAABAA) Season 27 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Ang kanhi collegiate standout uban sa University of San Jose-Recoletos (USJ-R) Jaguars nga way duda maoy labing bangiitan nga produkto sa SHAABAA mibubo og 18 puntos ug milangkat og makalisang nga 21 ka rebounds sa dihang ang Core Pacific miangkon sa solong liderato sa Division A bitbit ang 2-0 rekord.

Si Co, nga nakaduwa sa Chowking sa Philippine Basketball League (PBL) ug Manila Metrostars sa Metropolitan Basketball Association (MBA) sa wala pa gibira sa Purefoods TJ Hotdogs sa ikaduhang hugna ug No.12 overall niadtong 2000 PBA Draft, duna say upat ka assists ug usa ka steal alang sa Core Pacific, nga milusad og eksplosibong rally sa ikaduhang kuwarter aron lat-an ang ilang kontra.

Ang Core Pacific abante lamang og sayes puntos, 18-12, human sa nag-unang 10 minutos sa aksiyon, apan mitagak og 20-7 nga bomba sa ikaduhang kuwarter aron paburoton ang ilang labaw ngadto sa 38-19 sa halftime, nga ilang pang giinat ngadto sa 42-22 sa tunga-tungang bahin sa ikatulong kuwarter.

Ang Core Pacific nakasustinir sa ilang kainit aron paglubong sa 2kcares.org og 15 puntos.

Nakakuha hinoon si Co og dakong suporta sa iyang mga kauban.

Si Mike Sala mitapos uban ang nuybe puntos ug lima ka rebounds, samtang sila si Andrew Po ug Jeremy Ryan Huang miamot og otso puntos matag duwa gawas nga nagkumboya sila'g 15 ka rebounds.

Sila si Johannes Chua, Glenn Ocampo, ug Dennis Que parehong mitali og siyete puntos samtang si Dave Michael Ting miamot og singko puntos, upat ka rebounds, ug upat ka  assists.

Sila si Sean Young ug Christian Tiongko mikadlit og 12 puntos matag usa apan way nahimo gumikan kay ang 2kcares.org nakatilaw sa una nilang pilde human mireshistro og duha ka sunod-sunod nga daog.