Gusto’g circus 

Gipahibawo sa prosecution panel, pinaagi ni Atty. Lorna Kapunan, nga dili na nila ipresentar ang nahabiling 15 ka mga testigo sa Article I sa impeachment case batok ni Bise Presidente Sara Duterte.

Inay ipresentar ang maong mga testigo nga gihulagway ni Kapunan nga mga “pawn, bishops, horses ug castles” sa duwa nga chess, maoy ilang tinguha nga ang labing importanteng pisa nga mao ang “queen” maoy ilang ipatawag sa witness stand.

Sa laktud gusto sa prosecution panel nga si Duterte mismo maoy motubag sa mga pangutana giunsa paggasto ang P612.5 milyones nga intelligence fund sa iyang buhatan. Gipasabot ni Kapunan nga basi sa mga pamahayag sa unang mga testigo nga ilang gipresentar, klaro ang direksiyon kinsa gyuy responsabli sa paggasto sa pundo.

Samtang di malalis nga dunay dakong tulobagon si Duterte giunsa paggasto ang pundo sa iyang buhatan, apan malisyoso ang lakang sa prosecution. Klaro ang ilang tumong sa plano nga ipresentar si Duterte—buot nilang pakauwawan ang bise presidente.

Gusto sa prosecution nga himoong circus ang impeachment court pinaagi sa pagtakuban sa pagpangita  kunohay sa kamatuoran. Isip beteranang abogado, nasayod si Kapunan nga dili nila mahimong pugson si Duterte sa pagtestigo batok sa iyang kaugalingon. Dunay proteksiyon si bisan kinsa ubos sa Constituion batok sa “self-incrimination.”

Bisan nahibawo na silang daan nga di mahimo ang ilang plano, suwayan nila og duso aron sukdon unsay mahimong reaksiyon sa kampo ni Duterte nga posibling ilang magamit sa laing natad sa kumbati nga mao ang propaganda.

Diay akong sugyot sa mga sakop sa prosecution. Hain may mas maayo nga inay si Duterte, inyong ipatawag sa witness stand ang mga security officers nga silang Col. Dennis Nolasco ug Raymund Dante Lachica.

Ang duha maoy magdugtong sa unang mga kasayuran nga gitug-an sa mga testigo nga silang duha maoy gitugyanan pagbayad sa mga informants gamit ang intelligence fund ni Duterte. Pinaagi sa pagsukit-sukit nilang Nolasco ug Lachica masayran sa publiko tinuod ba nga dunay mga informants nga gibayran o mugna lang ang listahan. Pinaagi niini masayran sa katawhan ang kamatuoran ug malikayan ang circus didto sa impeachment court.