Nahimong historical monument

Gipalabang na sa Kongreso ang balaodnon nga nagtakda sa termino sa barangay ug SK officials ngadto sa lima ka tuig. Ang maong balaod nagsuspenso usab sa BSK Election karong tuiga ug nag-oktaba niini ngadto sa Nobiyembre 2028.  Dagko na’g ngisi karon ang anaa sa pwesto kay malugwayan pa man ang ilang termino.  Nagkulismaot usab kadtong buot mohagit sa namunoan kay magpaabot pa man sila sa laing kahigayonan. Komento pa sa mga botante, “Sa kadugay na nga naglingkod sa katungdanan sa mga barangay official tungod sa pagpunay og postpone sa election, dili na sila mga opisyal lamang kon dili nahimo na sila’ng historical monument sa barangay.” Muleeng!

“Incarceritis ug handcuffitis”

Human moluwat ang Sandiganbayan og warrant of arrest batok kang kanhi Speaker Martin Romualdez, mi-petisyon gilayon ang iyang mga abogado alang sa pagpabilin kaniya sa hospital inay pagbalhog kaniya sa bilanggoan.  Nalista sa maong petisyon ang nagkadaiyang balatian ni Romualdez nga naglakip sa cardiovascular ug neurological conditions.  Kadaghan na man kita makakita ani’ng salidaha. Matud pa sa mga kritiko, “Ang tinuod nga sakit ni Romualdez mao ang “incarceritis” ug handcuffitis”, ang matang sa balatian nga motumaw gilayon sa higayon nga pagadakpon na ang akusado.” Madahaan!

Warm-up lang

Gitudlo ni Presidente Marcos, Jr., si boxing icon Manny Pacquiao isip lead convenor sa National Anti-Poverty Commission, ang ahensya nga maoy mag-coordinate sa tanang anti-proverty programs sa kagamhanan.  Kahuyang sa ekonomiya ug kakulang sa trabaho ang dakong hinungdan sa kakabos sa kinabag-an sa katawhan.  Dili ekonomista si Pacquiao, busa, dakong pangutana pa kon epektibo ba siya sa maong gimbuhaton. Matud pa sa mga political observers, “Tataw nga “warm-up” ra kining kasamtangan’g posisyon ni Pacquiao alang sa usa ka national position karon’g umaabot nga 2028 election.” Klareex!

Natawo sa ting-init

Segun sa datos sa Provincial Health Office, nagpabilin ang probinsiya sa Sugbo nga adunay labing taas nga kaso sa potot (stunted) nga kabataan sa tibuok nasud, bisan tinuod nga napakubsan na kini sukad niadtong tuig 2023.  Matawag nga putot ang bata kon kulang ang iyang gitas-on sa naandan base sa iyang pangedaron.  Sagad nga hinungdan sa pagka-potot sa bata mao ang chronic undernutrition, prolonged poor nutrition, balik-balik nga infection ug kakulang sa pag-atiman. Apan lahi ang pagtoo sa akong apohan kay alang kaniya, “Ang hinungdan nga mahimo’ng potot ang bata tungod kay natawo siya atol sa ting-init.” Pagkatoytoy!

Salig, ayaw laum

Namahayag ang Department of Agriculture (DA) nga wala sila’y gidahom nga pagsaka sa presyo sa bugas bisan pa man kon adunay pagsaka sa presyo sa gasolina.  Kini tungod kay aduna pa kuno kitay igong imbentaryo sa bugas bisan pa sa mga nangagi’ng bagyo.  Apan alang sa katawhan, wala gihapo’y kaseguroan nga dili mosaka ang presyo sa bugas. Kay matud pa lage, “Kontrolado lang sa DA ang ilang pamahayag ug pasalig apan dili gayod nila kontrolado ang mga manindahay og bugas nga maoy nagbuot sa presyo.” Fezteleern!