Trust ratings nina Pangulong Marcos, VP Sara bumaba sa huling quarter – survey
MANILA, Philippines — Ayon sa latest survey ng Social Weather Stations (SWS) ay kapwa bumaba ang trust ratings nina Pangulong Bongbong Marcos at Vice President Sara Duterte sa huling bahagi ng taong 2024 na isinagawa noong Disyembre 12 hanggang Disyembre 18, sa pamamagitan ng face-to-face interviews at nilahukan ng 2,160 respondents sa buong bansa.
Bahagyang bumaba ang mga Pilipinong may “Much Trust” sa Pangulo mula 57% noong Setyembre patungong 54% ngayong Disyembre habang ang mga may “Little Trust” ay hindi nagbago sa 25%.
Gayunpaman, kung ikukumpara sa loob ng anim na buwan mula Hulyo hanggang Disyembre, mapapansin ang malaking pagbaba nito, kung saan ang mga taong may “Much Trust” sa Pangulo ay bumulusok sa 54% mula sa 64%.
Iyon namang “undecided” o nag-aalinlangan sa kanilang pagtitiwala sa Pangulo ay tumaas mula 14% patungong 19% ngayong buwan.
May pinakamalaking pagbaba sa trust rating ng Pangulo sa Mindanao, kung saan ang bilang ng mga taong may “Much Trust” sa kanyang pamumuno ay bumulusok sa 33% ngayong Disyembre mula sa 50% noong Hulyo.
Samantala, nabawasan din ng tatlong puntos ang bilang ng mga Pilipinong may “Much Trust” kay Duterte, mula 55% noong Setyembre patungong 52% ngayong Disyembre.
Gayunpaman, kung ikukumpara sa loob ng anim na buwan o mula Hulyo hanggang Disyembre, natapyasan ng 13% ang mga Pilipinong may “Much Trust” kay Duterte, mula 65% noong Hulyo tungong 52% ngayong Disyembre.
Umakyat naman sa 29% mula sa 21% ang may “Little Trust” sa bise presidente, gayundin ang mga “undecided”, na mula sa 13% ay naging 17%.
Napakalaking pagguho sa trust rating ni Duterte ay sa National Capital Region at Balance Luzon.
Sa NCR, ang mga may “Much Trust” kay Duterte ay nabawasan ng 21% mula 62% noong Hulyo tungong 41% ngayong Disyembre.
Katulad nito, sa Balance Luzon, ang mga may “Much Trust” kay Duterte ay bumaba rin ng 22% sa loob ng anim na buwan, habang ang mga may “Little Trust” ay lumago ng 13%.
Isinagawa ang survey noong Disyembre 12 hanggang Disyembre 18 sa pamamagitan ng face-to-face interviews sa 2,160 respondents.
- Latest
