P33.8 milyong nga ayuda gihatag sa kapitolyo sa ika-upat nga Distrito
MANILA, Philippines — Laing hugna sa tabang pinansyal ang gibubo sa Probinsiya sa Sugbo ngadto sa local government unit sa ika-upat nga distrito sa Probinsiya.
Si Gobernador Gwendolyn Garcia, uban ni kongresista Janice Salimbangon mihatag og sumatotal P33.8 million nga calamity ug infrastructure funds ngadto sa mga LGUs sa maong distrito atol sa gipahigayon nga Caravan of Government Services niadtong Hunyo 21.
Tag P5 milyones ang nadawat nila ni Medellin Mayor Joven Mondigon Jr., San Remigio Mayor Alfonso Pestolante, Tabuelan Mayor Raul Gerona, ug Tabogon Mayor Francis Salimbangon.
Sila si Daanbantayan Vice Mayor Ali Abucay ug Bogo City Administrator Antonieto Suico nakadawat usab og tag P5milyones alang sa ilang mga LGUs.
Sa maong kantidad nga gihatag, P3 million ang sa calamity fund samtang ang nahabilin nga P2 million alang sa proyekto sa imprastraktura sa lungsod.
Ang calamity fund gihatag subay sa deklarasyon sa State of Calamity sa Probinsiya sa Sugbo tungod sa epekto sa El Niño.
Mokabat usab sa 19 ka barangay ang nakadawat og tabang pinansyal gikan sa Kapitolyo.
Tag tulo ka barangay sa matag LGU sa cuatro distrito gawas sa Bogo nga adunay upat (4) ka barangay ang nakadawat og tag P200,000 alang sa programa ug proyekto sa imprastraktura niini. (BANAT NEWS)
- Latest
