Dili kahadlokan ang ICC
Kon tinuod ang pagduda nga istorya ra ni Presidente Ferdinand Marcos Jr. sa iyang pag-awhag sa mga kongresista sa dili pag-impeach ni Bise Presidente Sara Duterte, pero tukion gihapon sa liderato sa House of Representatives ang impeachment complaints nga napasaka na, andam ang mga Duterte sa ilang alkontra.
Sagpa batok sa Malacañang ang makapakugang nga pahibawo sa Iglesia ni Cristo (INC) sa paglusad og nasudnong mga protesta batok sa impeachment. Bisan pa sa ulug-ulog nga ang ilang rallies mo-suporta sa baruganan sa presidente nga dili makatabang sa katawhan ang impeachment.
* * *
Human sa pila ka buwan nga mga pasumbingay, giklaro sa INC hain sila kapusta sa bangga sa mga Marcos ug mga Duterte. Posible diayng dunay bendisyon gikan sa INC ang panglawgaw sa ilang sakop nga si Kongresista Rodante Marcoleta sa imbestigasyon sa House sa mga pasangil nga gikawat sa bise presidente ang iyang confidential funds sa Office of the Vice President (OVP) ug Department of Education (DepEd).
Unsay tubag sa Malacañang? Mamilok? O ipadayon ang imbestigasyon sa mga Duterte nga nakadasig sa nagkalainlaing mga grupo pagpasaka sa impeachment complaints?
* * *
Nagkasungi ang mga simbolo sa tapok sa Malacañang sa 200 ka kongresista uban nilang House Speaker Martin Romualdez ug sa presidente. Sa usa ka bahin, pagpakita sa puwersa sa administrasyon batok sa mga Duterte ug mga alyado. Pero sa pikas nga bahin, mapasanginlan sab nga natarantar sa sumbalik sa giisip nga naapiki nang dinastiya sa Davao.
Nabantang ang pagkatay-og sa administrasyon sa pag-insistir sa mga nanambong nga wala hisguti ang impeachment kay lain ang tuyo sa dugay nang natakda nilang tigom.
* * *
Kon moginhawa og luag silang Marcos ug Romualdez, ilang maamgohan nga dili kahadlokan ang INC. Nga ilang suporta sa mga Duterte wala magkahulogan nga inihap ang mga adlaw sa administrasyon. Nga ang giplanong mga protesta dili garantiya sa kadaogan sa mga Duterte.
Niadtong Abril 2001, nangulo ang INC sa Edsa 3, ang protesta sa pagpabalik sa gahom ni kanhi Presidente Joseph Estrada, kinsa gipalagpot sa Edsa 2 sa Enero niadtong tuiga. Nakatapok sila og 100,000. Pero nagpabiling napriso si Estrada, nakonbikto sa plunder sa wala pa gi-pardon ni kanhi Presidente Gloria Macapagal Arroyo sa 2007.
- Latest
