Peligrong mabangkarota

Kada Pilipino, bisan ang mga bata nga bag-o lang nahimugso sa Cebu Maternity Hospital (nga nagsaulog sa ika-104 nilang anibersaryo karong tuiga), nagtangag na og utang nga mayoriya nila walay katakos pagbayad. Salamat sa kapalautang ni Presidente Ferdinand Marcos Jr.

Gipahibawo sa Bureau of Treasury nga sa pagtapos sa Agosto karong tuiga niburot ang utang sa Pilipinas ngadto sa ?19.61 trilyones. Kon bahin-bahinon sa gibanabana nga 117 milyones ka Pilipino (nga maoy banabana sa Philippine Statistics Authority nga nasudnong populasyon sa 2026), kada usa nato utangan og P167,607.

-o0o-

May sukaranan ang mga pangutana: Unsa may gigastohan sa utang? Nilambo ba ang basic services nga napahimuslan sa katawhan? Natambalan ba ang labing nagkinahanglan nga mga pasyente? Napalambo na ba ang kalidad sa edukasyon pinaagi sa pagtukod og dugang classrooms ug pag-hire ug pag-uminto sa suholan ug benepisyo sa mga magtutudlo?

Nahatagan ba og dugang suporta ang mga mag-uuma ug mga mangingisda? Nahaw-as ba sa kagutom ang labing kabos nga mga pamilya? O mas niburot lang ang bolsa sa kawatan nga mga opisyal sa gobyerno ug kakonsabong mga negosyante?

-o0o-

Gisaway si kanhi presidente Rodrigo Duterte sa sobra pa sa pagdoble sa utang: Ang P5.95 trilyones sa pagbiya ni anhing presidente Noynoy Aquino sa 2016 nahimong P12.79 trilyones sa pagkanaog niya sa Malacañang sa 2022.

Wala palupig si Marcos Jr. Nakatabla nang Duterte pinaagi sa pagpangutang og P6.82 trilyones sa unang upat ka tuig sa iyang administrasyon. Malabwan na si Duterte sunod tuig kay mangutang og dugang P1.7 trilyones pagtapal sa dakong alkanse sa budget.

-o0o-

May sukaranan ang kahadlok nga si Marcos Jr. mosunod nilang Marcos Sr. ug Duterte:

•Gi-bangkarota ni Duterte ang nasudnong ekonomiya niadtong 2020 tungod sa lapad nga kinawatay ug mismanagement sa COVID-19; samtang

•Labaw pang gi-bangkarota ni Marcos Sr. ang nasud niadtong 1984, usa ka tuig human patya ni Ninoy Aquino, dihang wala na pautanga sa langyawng mga bangko kay gawas sa lapad nga pangurakot nasakpan nga nipeke sa dollar reserves ug naglisod og bayad sa mga utang sa iyang cronies nga gi-garantiyahan sa iyang diktadura pero giwaldas lang sa mga kapritso.