Tripleng torneyo sa tennis sa Moalboal nagmalampuson

CEBU, Philippines — Sila si Aner Ortega ug Miriam Christine Seno maoy nanghawod sa malampuson nga Christmas Triple Tennis Tournament nilang Congressman Peter John ug Dr. Patsy Calderon didto sa lungsod sa Moalboal, habagatang bahin sa Sugbo ning bag-ohay pa lamang.

Nakaipsot sila si Ortega ug Seno sa lig-on nilang mga kaatbang nga sila si Engr. Noel Grengia ug Vivencio Delgado sa sikit kaayong desisyon, 8-7 (5), aron sakmiton ang titulo nga nagtangag og P6,000 nga ganti.

Sa sangka alang sa ikatulong dapit, sila si TJ ugd Karen Chiong mipukan nilang John Arvin Chiong ug Richard Tabanao aron kubrahon ang P3,000 nga premyo.

Ang Night Shift usa sa tulo ka mga torneyo nga gipaluyohan sa mga Calderons. Ang laing duha mao ang Sunrisers ug Sundowners nga gipahigayon didto sa Moalboal plaza tennis court.

Sa Sunrisers group, sila si Romeo Pableo ug Restituto Arong ang mibira sa korona human gilupig sila si Jake Gador ug Mayor Inocentes "Titing" Cabaron.

Samtang sila si Jake Carba ug Kito Tampus ang midominar sa Sundowners group uban ang impresibong pito ka daog nga giatbangan og usa lamang ka pilde.

Sila si Gresulmar Carba ug Merl Ian Sabanal ang nalandig sa ikaduhang puwesto sa Sundowners.