OKC Thunder mitabla sa ilang franchise record

CEBU, Philippines —  Milansang sa ika-14 nilang sagunson nga daog

Si Shai Gilgeous-Alexander mipaulbo og 33 puntos sa dihang gipabugnaw sa Oklahoma City Thunder ang New York Knicks, 117-107, alang sa ika-14 nilang sagunson nga daog sa NBA kagahapong adlawa didto sa Paycom Center sa OKC.

Tungod niini, gitabla sa Thunder ang ilang franchise record alang sa labing taas nilang sunod-sunod nga daog nga ilang nakab-ot niadtong 1995-96 season sa dihang nagdala pa sila sa pangan nga Seattle SuperSonics.

Gawas niini, giputol sab sa Thunder ang siyam ka nagkadenang daog sa Knicks nga maoy labing taas nilang ratsada sukad niadtong 20913.

Ikaupat pa lamang kini nga higayon sa 79 ka tuig nga kasaysayan sa NBA diin nagbangga ang duha ka teams nga gikan sa siyam o sobra pa ka sagunson nga daog.

Ang Canadian nga sentrong si Gilgeous-Alexander mipasud og 12 sa 26 niya ka itsa ug way sipyat sa pito niya ka free throws.

Nakakuha siya og dakong suporta gikan nilang Jalen Williams ug Aaron Wiggins nga nagkumboya'g 39 puntos alang sa Thunder.

Didto sa Denver, si Victor Wembanyama mirehistro sa ika-100 niyang daoy isip NBA player human gipayaka sa San Antonio Spurs ang Nuggets, 113-110. Nadoble ang kalipay ni Wembanyama kay nahitabo kini atol sa bisperas sa ika-21 nga sumad sa adlaw niyang natawhan.

Ang 2024 NBA Rookie of the Year miharos og 35 puntos, 18 ka rebounds ug upat ka assists aron wanihon ang alas sa Nuggets nga si Jokic nga mikolekta og 41 puntos, 18 ka rebounds ug siyam ka assists sa pilderong kawsa.

Sa laing bahin, gilabyan ni NBA all-time scoring leader LeBron James si Michael Jordan alang sa labing daghan nga 30 puntos sa usa ka duwa sa kasaysayan sa NBA nga miabot na ngadto sa 563.

Naangkon kini ni James human siya mitali og 30 puntos sa dihang gipasukarap sa Los Angeles Lakers ang Atlantaw Haws, 119-102, didto sa ilang korte.

Si Anthony Davis miamot og 18 puntos ug 19 ka rebounds alang sa Lakers.

Didto sa Dallas, ang Cleveland Cavaliers miinat sa labing nindot nga rekord ning season ngadto sa 30-4 human ilang gipaluhod ang Mavericks, 134-122.

Si Evan Mobley miposte og 34 puntos ug 10 ka rebounds aron ituboy ang Cavs ngadto sa ikasiyam nilang sunod-sunod nga daog.

Misidlak sab sila si Derrick White, Jayson Tatum ug Payton Pritchard nga nagkumbinar og 63 puntos sa dihangf giugbok sa defending champion Boston Celtics ang Houston Rockets, 109-86.