Heat misuspenso ni Butler og pito ka duwa

CEBU, Philippines —  Ang six-time NBA All-Star forward nga si Jimmy Butler gisuspenso sa Miami Heat og pito ka duwa tungod sa gibuhat niini nga dili makiangayon ngadto sa ilang team.

Dungan niini, ang Heat nagkanayon nga modawat na sila og mga tanyag gikan sa mga koponan nga interesado nga mokuha ni Butler gikan kanila.

Usa ka adlaw human si Butler namahayag nga nawad-an na siya og kalipay nga moduwa sa NBA ug lagmit dili na kini niya makita kon magpabilin siya sa Heat, ang team mihimo dayon og aksiyon nunot sa kritikal nga komento sa sinaligan nilang bitoon.

"We have suspended Jimmy Butler for seven games for multiple instances of conduct detrimental to the team over the course of the season and particularly the last several weeks," dason pa sa Heat sa usa ka opisyal nga pamahayag.

"Through his actions and statements, he has shown he no longer wants to be part of this team. Jimmy Butler and his representative have indicated that they wish to be traded, therefore, we will listen to offers."

Si Butler, nga mi-iskor lamang og nuybe puntos sa ilang kaparotan batok sa Indiana Pacers niadtong Biyernes, dili makaduwa sugod sa ilang sangka batok sa Utah Jazz karong adlawa. Makabalik siya karon pang Enero 17 batok sa Denver Nuggets.

Posible hinoon nga niining panahona, ang Heat nakakita na og team diin buhian nila ang 35-anyos nga guard.

Si Butler mi-average og 17.6 puntos, 5.5 rebounds ug 4.7 assists matag duwa ning season alang sa Heat, nga ikaunom karon sa Eastern Conference uban ang 17-15 rekord.

Si Butler, nga anaa karon sa ika-15 niyang tuig sa NBA, migiya sa Heat ngadto sa 2020 NBA Finals, diin sila gipilde sa Los Angeles Lakers, ingon man sa 2023 finals, diin sila gibuntog sa Denver Nuggets.